Fimm hermenn sæta nú rannsókn innan breska hersins vegna ásakana um að hafa ráðið meintum vígamanni bana í Sýrlandi fyrir tveimur árum. Er hermennirnar sakaðir um að hafa beitt óhóflegum agerðum sem urðu manninum að aldurtila.
Hermennirnir sem um ræðir eru í sérsveit breska hersins, SAS, sem sinnir leynilegum aðgerðum í Sýrlandi sem og annars staðar í heiminum. Eru hermennirnir sakaðir um að hafa skotið hinn meinta vígamann til bana þegar vel hefði verið hægt að taka hann höndum, að því er breska dagblaðið Daily Mail greinir frá. Sjálfsmorðs sprengjuvesti fannst nálægt líki mannsins en hann bar það ekki þegar honum var ráðinn bani. Hermennirnir sem um ræðir neita ásökununum og halda því fram að raunverleg ógn hafi staðið af manninum.
Eftir því sem Daily Mail greinir frá hefur herlögreglan breska rannsakað málið og þegar vísað því til saksóknara innan hersins. Kjósi saksóknari að sækja málið mun verða réttað yfir hermönnunum fyrir herrétti í Bretlandi.
Breskar hersveitir hafa beitt sér í borgarastríðinu í Sýrlandi frá árinu 2014, sem hluti af sameiginlegum herafla Bandaríkjanna og NATO ríkja í landinu, með það að markmiði að sigrast á hryðjuverkasamtökum Íslamska ríkisins í Sýrlandi og í Írak. SAS hefur staðið fyrir leynilegum aðgerðum í Sýrlandi árum saman og meðal annars stutt við Sýrlenska frelsisherinn, hersveitir Kúrda, sem hafa norðausturhluta Sýrlands að mestu á valdi sínu. Sýrlenski frelsishreinn hefur leikið lykilhlutverk í baráttunni gegn Íslamska ríkinu.
