Tólf ára barn er látið og tvö önnur eru alvarlega særð eftir skotárás í skóla í Vantaa í Finnlandi. Jafnaldri hinna látnu og særðu er í haldi lögreglu, grunaður um árásina.
Sá sem grunaður er um árásina er einnig nemandi við Viertola grunnskólann í Vantaa. Lögregla var kölluð til um níu leytið í morgun að staðartíma en þá hafði hinn meinti árásarmaður lagt á flótta. Lögregla hafði hendur í hári hans í úthverfi Helsinki nokkru seinna að því er finnska ríkisútvarpið YLE greinir frá.
Skotvopnið sem notað var við árásina var skráð og í eigu náins aðstandanda barnsins sem grunað er að því er segir í frétt YLE. Lögregla mun ekki hafa neinar upplýsingar um hvað barninu gekk til.
Viertola grunnskólinn í um 18 kílómetra fjarlægð norður af Helsinki. Þar stunda um 800 börn nám og og starfslið er um 90 manns. Nemendum í skólanum var haldið í skólastofum sínum og yfirvöld hvöttu almenning til að forðast svæðið þar nærri og halda sig innadyra.
Finnski forsætisráðherrann Petteri Orpo sagði að skotárásin væri mikið áfall. „Hugur minn er hjá fórnarlömbunum, fjölskyldum þeirra og samnemendum þeirra og starfsfólki Viertola skólans,“ skrifaði Orto á Twitter.
Árið 2008 og 2007 voru framdar tvennar skotárásir í skólum í Finnlandi, þar sem annars vegar átta tíu nemendur og hins vegar átta nemendur létu lífið. Í báðum tilvikunum voru árásarmennirnir eldri, 22 ára og 18 ára. Þeir tóku báðir eigið líf. Eftir þær árásir herti finnska ríkisstjórnin á reglum um notkun skotvopna.
