Gríðarlegir skógar- og gróðureldar hafa geysað í Venesúela allt þetta ár, fleiri en nokkru sinni fyrr. Ástæðan er miklir þurrkar í landinu sem orsakast af loftslagsbreytingum. 

Frá janúarmánuði og út mars mátti greina yfir 30.200 sjálfstæða gróðurelda í Venesúela og hafa þeir aldrei mælst fleiri frá því að virkt eftirlit var tekið upp árið 1999. Meðal annars loga eldar í Amazon-regnskóginum sem kviknað hafa vegna þurrkanna. Alla jafna kvikna eldar ekki í frumskóginum af sjálfsdáðum sökum þess hversu rakt er þar, heldur eru eldar kveiktir af fólki til að ryðja land til ræktunar. Þeir eldar hafa hins vegar breitt stjórnlaust úr sér vegna þess hversu hátt hitastig er nú og lítil úrkoma. 

Vísindmenn segja þurrkana afleiðingu loftslagsbreytinga af mannavöldum og breytinga sem þær hafa haft á El Niño viðurfyrirbrigðið í Kyrrahafinu austanverðu, sem hefur áhrif á veðurkerfi á hnettinum öllum. 

Ofsafengnustu gróðureldar í Suður-Ameríku eiga sér alla jafna stað í Brasílíu í ágúst og september, meðfram suðaustanverðum hluta Amazon-regnskógarins þar sem gróðureyðing til ræktunar er umfangsmest. 

Regntímabilið stendur sunnar í álfunni og hefur regnið slökkt mikla gróðurelda sem geysuðu í Brasilíu. Í Venesúela er regntímabilið hins vegar ekki væntanlegt fyrr en í maí. Vísindamenn hafa, í ljósi stöðunnar í Venesúela, miklar áhyggjur af því hvernig mál muni þróast sunnar í Suður-Ameríku þegar þurrkatímabil hefst þar. Sérfræðingur í gróðureldum við Háskólann í Oxford, Manoela Machado, segir flest benda til að þar þurfi fólk að búa sig undir risavaxna gróðurelda, af biblíulegum skala.