Kim Jong Un, einræðisherra Norður-Kóreu, sagði í dag að landsmenn yrðu að vera reiðubúnir undir stríð, nú sem aldrei fyrr. Titringur og óstöðugleiki alþjóðasamskiptum og samskiptum ríkja í næsta nágrenni við Norður-Kóreu væru slík að þetta væri staðan.
Leiðtoginn lýsti þessu í heimsókn sinni í helsta hernaðar háskóla landsins, heitinn eftir föður hans Kim Jong II, í gær að því er KCNA ríkisfréttastofan greinir frá.
Norður-Kórea hefur á síðustu árum aukið vopnaþróun og -framleiðslu sína verulega og þá hefur ríkið styrkt hernaðarleg og pólitísk samskipti við Rússland. Þannig er fullyrt að Norður-Kórea hafi séð Rússum fyrir vopnum í Úkraínustríðinu meðal annars.
Kim lýsti því fyrir nemendum og starfsfólki háskólans að „ef óvinurinn velur að mæta Alþýðulýðveldinu Kóeru með hernaði, mun Alþýðulýðveldið Kórea veita óvininum náðarhögg án nokkurs hiks, með því að virkja til þess allt sem tiltækt er“. Hann lýsti, að því er KCNA greindi frá, flókinni stöðu á alþjóðasviðinu og óstöðugri stöðu hernaðarmála og stjórnmála í næsta nágrenni Norður-Kóreu og því væri nú runninn upp sá tími að þörf væri á því að vera betur undirbúinn undir styrjöld en nokkru sinni.
Norður-Kórea hefur sakað Bandaríkin og Suður-Kóreu um hernaðarlegar ögranir með því að stunda það sem stjórnvöld í landinu kalla „stríðsleiki“. Er þar vísað til aukinnar tíðni og ákafa í heræfingum ríkjanna tveggja á síðustu mánuðum.
Fyrr í þessum mánuði fylgdist Kim með tilraunaskoti nýs háhraða millidrægrar skotflaugar. Sú notar eldsneyti í föstu formi og segja hernaðarsérfræðingar það muni auka getu Norður-Kóreu til að beita flugskeytum með markvissari hætti en verið hefur.
