Sú var tíðin að Félag atvinnurekenda hér á landi leit með velþóknun vestur um haf til stjórnarhátta og áherslu í atvinnulífi. Nú er öldin önnur. Ólafur Stephensen, framkvæmdastjóri Félags atvinnurekenda, ritar færslu á samfélagsmiðla í morgun vegna nýjustu ummæla Donalds Trump forseta Bandaríkjanna. Ólafur sér ekki betur en Trump hafi endanlega misst vitið.

„Í morgunsárið leyfði ég mér að efast – eins og margir aðrir – um að Donald Trump hefði raunverulega sent forsætisráðherra Noregs þessi skilaboð,“ skrifar Ólafur og vísar til ummæla þar sem Trump segist hættur að hugsa um frið í heiminum vegna þess að hann hafi ekki sjálfur hlotið friðarverðlaun Nóbels.

„Nú er Jonas Gahr Støre hins vegar búinn að staðfesta að svo sé. Við lifum á ótrúlegum tímum. Valdamesti maður heims er búinn að missa vitið og fólkið í nánasta hring hans í Washington er ennþá í hlutverki hirðmannanna í Nýju fötunum keisarans, sem mæra valdamanninn, hrósa búningi hans og halda uppi faldinum sem er ekki þarna. Ögn kaldhæðnislegt að atburðarásin þarna vestra sé eins og upp úr þessu ástsæla danska ævintýri,“ segir Ólafur.

Ólafi er brugðið, líkt og heimsbyggðinni.