Útgerðin 800 milljörðum ríkari í raun en á pappírunum

Sjávarútvegur 28. okt 2022

Samkvæmt samantekt Deloitte eru skráð eign útgerðarinnar á kvóta 405 milljarðar króna. Þetta er aðeins um þriðjungur af markaðsvirði kvótans, sem er um 1.200 milljarðar. Útgerðin er því miklu ríkari en fram kemur í ársreikningum fyrirtækjanna, miklu máttugri.

Þetta kemur í nýjasta tölublaði Stundarinnar. Ástæðan fyrir þessum mun er að kvótinn er færður í bækur á nafnvirði, oftast á því verði sem hann var keyptur á fyrir mörgum árum. Markaðsvirði kvótans er hins vegar þekkt, kvóti gengur kaupum og sölum og því auðvelt að sjá hvert raunvirði hans er.

Miðað við mat útgerðarinnar sjálfrar á verðmæti kvótans er hann um 1.200 milljarða króna virði. Að nafninu til er þetta eign þjóðarinnar en í raun eign útgerðarinnar, að stærstum hluta eign 8-12 fjölskyldna.

Í Stundinni kemur fram að eigið fé útgerðarinnar sé um 373 milljarðar króna, en ættu að vera nær 1.200 milljörðum króna ef kvótinn yrði bókfærður á raunvirði.

Raunvirði kvótans afhjúpar hversu lág veiðigjöld eru, um 0,4% af verðmæti kvótans á ári. Það er álíka hlutfall og ef íbúð sem kostar 60 m.kr. væri leigð út á 20.800 kr. á mánuði.

Lág veiðigjöld og ódýr aðgangur að auðlindum sjávar er helsta ástæðan fyrir því að eigendur stórútgerðarinnar hafa auðgast stórkostlega á undanförnum árum og eru í dag orðnir ríkari í samanburði við almenning en ríkt fólk hefur nokkru sinni verið á Íslandi.

Samstöðin er umræðu- og fréttavettvangur sem studdur er af almenningi í gegnum Alþýðufélagið. Ef þér líkar efni Samstöðvarinnar getur þú eflt hana með því að gerast einskonar áskrifandi sem félagi í Alþýðufélaginu. Skrá mig arrow_forward

Rauða borðið
í beinni
Rauða borðið, 24. maí