Inga Sæland formaður Flokks fólksins hefur lagt fram frumvarp um breytingu á lögum fjöleignahúsa á þá leið að hunda- og kattahald sé ekki háð leyfi annarra íbúa húsanna. Inga segir núgildandi lög innihalda stéttaskiptingu.
Inga Sæland var í viðtali á Reykjavík síðdegis í dag þar sem hún tók ýmis dæmi máli sínu til stuðnings. „Við erum alltaf að heyra af sorgarsögum í samfélaginu þar sem fólk er orðið eitt eftir jafnvel og það eina sem það hefur í félagsskap er kisinn sinn eða voffinn sem hefur kannski fylgt fólki í mörg ár,“ sagði hún og bætti við að um algjöra mismunun væri að ræða, það væri óréttlátt að einstaklingur þurfi að hafa efni á því að búa í sérbýli eða einbýli til að halda gæludýr.
Inga segir að með breytingunni myndi áfram gilda svokallaður nábýlisréttur og að húsfélög gætu sett sér sérreglur um dýrahald og bannað dýr sem ekki væru húsum hæf.
Eins og lögin eru í dag þurfa 2/3 íbúa fjölbýlanna að samþykkja dýrahald nágranna sinna.
Inga segir fólki mismunað harkalega. „Venjulega er það sá þjóðfélagshópur sem býr við bágustu kjörin sem er níðst á í allar áttir og líka hvað þetta varðar,“ segir hún.
Í gær fór í gang undirskriftalisti til stuðnings frumvarpinu og um kvöldmatarleytið höfðu þegar 3.500 manns skrifað undir hann. Hægt er að skrifa undir listann með því að smella á hlekkinn hér fyrir neðan:
