„Hugmyndin með að nota rafmagn við veiðarnar hefur ekkert að gera með að hafa þær mannúðlegri og láta hvali drepast fyrr. Rafmagnið mun bara deyfa dýrið og láta það líta út fyrir að vera minna lifandi en það er og hreyfingarlausara á meðan því blæðir út og þar af leiðandi mun það koma miklu betur út á myndbandsupptöku,“ segir Henry Alexander Henrysson heimspekingur og einn þeirra sem sat í fagráði Matvælastofnunar, sem mælti gegn hvalveiðum í vor.
Henry Alexander skrifar grein í tilefni skýrslu frá starfshópi ráðherra sem birt var á mánudaginn þar sem ýmsar mögulegar umbætur í veiðiaðferðum á stórhvelum voru skoðaðar. Og því að Svandís Svavarsdóttir matvælaráðherra mun tilkynna eftir ríkisstjórnarfund hvort hún muni framlengja hvalveiðibannið.
„Að mínum dómi er ekkert nýtt í þessari skýrslu, hún vissulega segir að það sé hægt að bæta veiðiaðferðir að einhverju marki,“ skrifar Henry Alexander. „En reyndar lokar skýrslan sem betur fer endanlega að mínu mati á þessar hugmyndir um að nota rafmagn við veiðarnar, það held ég að sé alveg stórhættuleg hugmynd og ég veit ekki til þess að það sé nokkur vísindamaður í heiminum sem styður þær tillögur eða hugmyndir.“
„Við höfum engar nýjar upplýsingar um að það sé hægt að tryggja mannúðlega aflífun stórhvela, það er ekkert í þessari nýju skýrslu sem gefur það í skyn,“ skrifar Henry Alexander. „Þó að skýrslan gefi í skyn að það sé hægt að bæta veiðarnar eitthvað þá þýðir það ekki að það sé hægt að tryggja mannúðlega aflífun hvalanna við veiðarnar.“
Lesa má grein hans hér: Rafskaut minnka ekki þjáningu dýra
