Á þriðjudagskvöld kom til átaka milli öfga-hægrihreyfinga og lögreglu í Madrid á Spáni, þriðja kvöldið í röð. Öll kvöldin komu nokkur þúsund manns úr röðum hægrihreyfinganna saman við höfuðstöðvar Sósíalistaflokksins til mótmæla gegn áformum stjórnvalda um að veita katalónskum sjálfstæðissinnum sakaruppgjöf vegna þjóðaratkvæðagreiðslunnar um sjálfstæði svæðisins sem haldin var fyrir sex árum síðan.

Sánchez forsætisráðherra á í viðræðum við flokka katalónskra aðskilnaðarsinna um stuðning þeirra við stjórnarmyndun. Flokkarnir tveir hafa á móti krafist sakaruppgjafar fyrir fjölda fólks sem flúði Spán eftir tilraunina til sjálfstæðisyfirlýsingar Katalóníu árið 2017. Hægriöfl á Spáni saka Sánchez um að láta undan lögbrjótum með þeim viðræðum.

Mótmælendurnir hrópa svívirðingar í garð Pedro Sánchez, starfandi forsætisráðherra og leiðtoga sósíalista. Einhverjir í hópi mótmælenda hafa vísað til sjálfra sín sem „nasista“ í slagorðum, að sögn ABC News. Á mánudagskvöld lögðust mótmælendurnir á girðingar sem óeirðalögregla hafði sett upp á svæðinu, og var þá svarað með kylfuhöggum og gúmmíkúlum frá lögreglu. Þrír voru þá handteknir.

Fulltrúar öfgahægriflokksins Vox hafa lýst yfir stuðningi við mótmælin, með hefðbundnum fyrirvara um að styðja ekki ofbeldi einstakra mótmælenda.