No Borders samtökin hafa gefið út yfirlýsingu þess efnis að þau styðji mómæli þau sem fóru fram á pöllum Alþingis heilshugar. „Grimm stefna ríkisstjórnar í útlendingamálum skapar slíka neyð og örvæntingu að grípa verður til örþrifaráða,“ segir í færslu samtakanna á Facebook.
Mótmælin sem No Borders vísa til áttu sér stað á þingpöllum síðastliðinn mánudag. Þar klifraði mótmælandi niður þingpalla, út yfir handrið það sem afmarkar pallana,hékk utan á þeim og kallaði til dómsmálaráðherra. Í þingsal stóð yfir fyrsta umræða um nýtt útlendingafrumvarp dómsmálaráðherra, en það segja No Borders að feli í sér gríðarlega skerðingu á réttindum fólks á flótta. Einkennist frumvarpið af „afmennskun og aukinni jaðarsetningu“ fólks á flótta.
Í færslu samtakanna segir að með frumvarpinu verði möguleikar flóttafólks sem þegar hafi hlotið vernd í öðru Evrópulandi til að fá mál sín skoðuð af íslenskum yfirvöldum engir orðnir. Skilyrði um fjölskyldusameiningar verði hert og undanþáguregla afnumin, og kærunefnd útlendingamála verði skorin niður úr sjö nefndarmönnum í þrjá.
Mótmælandinn sem um ræðir er flóttamaður og tilheyrir hópi fólks sem vísað var á götuna í ágúst síðastliðnum. Hann er nú búsettur í neyðarskýli Rauða krossins. „Þar dvelur á þriðja tug manns, gjörsamlega réttindalaust og án aðgengis að heilbrigðisþjónustu. Öryggismyndavélar eru á öllum stöðum og fylgjast með hverju fótmáli. Sturtuaðstaðan er í gámum fyrir utan húsið. Þeim ber skylda að yfirgefa húsnæðið frá kl. 10 til kl 17 þó þau hafi í engin hús að venda. Börnum er meinað um að dvelja í neyðarskýlinu og hefur móður á flótta verið vísað á götuna ásamt 18 mánaða gömlu barni sínu,“ segja No Borders.
Þá áformi ríkisstjórnin einnig að koma á laggirnar „fangabúðum fyrir fólk á flótta þar sem meðal annars börn verða færð í varðhald. Þessi fólskulegu áform ríkisvaldsins eru knúin áfram af kerfislægum rasisma og hvítri yfirburðahyggju. Þeirri hugmynd þrælahaldsins að hvít yfirstétt geti hneppt brúnt eða svart fólk í fjötra að eigin geðþótta.
Yfir þessum hópi, auk alls flóttafólks á Íslandi, vofir nú mikil hætta um enn frekari skerðingu á réttindum þeirra, verði frumvarpið samþykkt,“ segir í færslu No Borders.
