Bandaríkin saka Rússa um að brjóta gegn alþjóðabanni gegn notkun efnavopna. Rússar hafi að sögn Bandaríkjamanna notað efnavopnið klórípikrín gegn úkraínskum hermönnum. Efnið veldur öndunarerfiðleikum og hefur virkni sem ekki er ósvipuð táragasi. Þá segja bandarísk stjórnvöld að Rússar einnig notað táragas í stríðsrekstrinum.
Klórípikrín var notað í miklu mæli í Fyrri heimsstyrjöld. Efnið er því sem næst litlaus, olíukenndur vökvi sem veldur óþægindum í augum, á húð og í lungum. Efnið var og er notað sem skordýraeitur en var bannað í hernaði árið 1993.
Auk þess eru Rússar sagðir hafa beitt í það minnsta tveimur tegundum táragassprengja í hernaði sínu, að því er Rauters fréttastofan hefur greint frá og haft eftir úkraínska hernum. Í það minnsta 500 úkraínskir hermenn hafi þurft á læknishjálp að halda eftir að hafa orðið fyrir eiturvopnaárásum og einn hermaður lést eftir að hafa kafnað úr táragasi.
Táragasi er alla jafna ekki beitt nema við óeirðastjórnun, þegar verið er að leysa upp mannfjölda í mótmælum til að mynda. Við slíkar aðstæður geta almennir borgarar yfirleitt flúið af svæðinu sem táragasi er beitt á en hermönnum, sem fastir eru í skotgröfum án gasgríma, er það næsta ómögulegt án þess að eiga á hættu að lenda í skothríð óvina.
Rússar hafa fullyrt að þeir búi ekki lengur yfir efnavopnum í vopnabúri sínu en frásagnir frá Úkraínu benda til annars.
