Sigurður Ingi Jóhannsson, formaður Framsóknar, sagði á þingi í þessari viku:

„Ég ætla að ræða hér í dag um sjálfstæði þingsins og þar með að einhverju leyti virðingu þess. Frá því að ég var kosinn fyrst inn á þing og til dagsins í dag hefur mér fundist sú þróun vera í gangi að sjálfstæði þingsins hafi minnkað. Staðan á auðvitað að vera þannig að framkvæmdarvaldið kemur með mál til þingsins og afhendir þinginu og þingið tekur við þeim til þess að vinna vinnuna. Á síðustu árum hefur það færst í vöxt að þingið hefur verið að biðja ráðuneytin um að vinna vinnu, til að mynda við nefndarálit og slíkt. Það er eðlilegt að leita til sérfræðinga ráðuneytanna en það getur verið varasamt að fara of langt.“

Þetta sagði sem sagt einn þeirra þingmanna sem einna lengst hefur setið í ríkisstjórn síðasta rúman áratug eða svo. Frá árinu 2013 og nánast til haustsins 2024 hefur Framsókn og þá Sigurður Ingi setið í ríkisstjórn. Með þeim yfirgangi sem hann nú kvartar yfir.

Sigurður Ingi sakast við núverandi ríkisstjórn: „Því miður hefur ný ríkisstjórn og nýr meiri hluti ekki farið nógu vel af stað í að snúa þessari þróun í rétta átt. Ég ætla að nefna hér nokkur dæmi.“