Guðmundur Hrafn Arngrímsson, formaður Samtaka leigjenda, lýsti því við Rauða borðið í kvöld hvernig stjórnvöld höfðu kæft leigubremsu vegna andstöðu húseigenda þrátt fyrir loforð um að setja á leigubremsu í tengslum við lífskjarasamninginn 2019.
Ný könnun Maskínu fyrir Samtök leigjenda sýnir afgerandi stuðning almennings við leigubremsu og líka leiguþak. 72% landsmanna styðja leigubremsu og 71% leiguþak, eins og fram kemur í þessari frétt: Mikill meirihluti vill leigubremsu og leiguþak
Guðmundur rakti andstöðu stjórnvalda og þeirra hagsmunasamtaka sem stjórna afstöðu ríkisstjórnarinnar. Andstaðan byggðist fyrst og fremst á kenningum um að leigubremsa og leiguþak myndi fækka íbúðum á leigumarkaði, en raunin væri ekki sú í þeim fjölda landa þar sem þessum aðgerðum er beitt. Ef skaði væri af leiguþaki og leigubremsu væri þeim ekki beitt í jafn miklu mæli í raun er á. Í sumar settu dönsk stjórnvöld bremsu upp á 4% hækkun húsaleigu í tvö ár á sama tíma o verðbólgan væri að slá í 8-9%.
Í vor skilaði átakshópur þjóðhagsráðs af sér skýrslu um húsnæðismarkaðinn og þar með leigumarkaðinn. Þar var fullyrt að óþarfi væri að setja á leigubremsu, nokkuð sem Guðmundur segir að hafi komið leigjendum gríðarlega á óvart. Tug þúsundir fjölskyldna líða fyrir okur á leigumarkaði og fá engan stuðning frá stjórnvöldum, sem taka ætíð upp óskir leigusala.
Í lok samtalsins var brugðið upp mynd af afstöðu fylgjenda stjórnmálaflokkanna við leiguþak. Á þeirri mynd sést ólík afstaða, en samt er það svo að meirihluti fylgjenda allra flokka styðja leiguþak.
Samstöðin er umræðu- og fréttavettvangur sem studdur er af almenningi í gegnum Alþýðufélagið. Ef þér líkar efni Samstöðvarinnar getur þú eflt hana með því að gerast einskonar áskrifandi sem félagi í Alþýðufélaginu. Þú getur skráð þig hér: Skráning félaga
