Mikil mótmæli eru í Bangladess þessa stundina vegna verkalýðsleiðtoga sem barinn var til dauða á sunnudaginn þegar hann var að reyna að stilla til friðar í átökum starfsmanna fatnaðar verksmiðju og eigenda.

Maðurinn sem um ræðir, Shahidul Islam, var einn af helstu leiðtogum verkalýðsfélagsins BGIWF (Bangladesh Garment and Industrial Workers) og hafði starfað um árabil við verkalýðsstörf. Hann var barinn til dauða sunnudagskvöld, við verksmiðjuna Gazipur í útjaðri Dhaka. En þar áttu sér stað hatrömm átök verksmiðju eigenda og starfsmanna vegna óborgaðra launa, og var Islam á svæðinu til að reyna að ná sáttum. Annar verkalýðsleiðtogi, Ahmed Sharif, slasaðist einnig í árásinni.

Verksmiðjueigendur höfðu áður lofað að borga starfsmönnum laun, eftir íhlutun Islam. En þegar það loforð var ekki efnt sauð uppúr meðal starfsmanna, og var Islam fenginn aftur á staðinn með fyrrgreindum afleiðingum. Hópur fólks réðst að þeim þegar þangað var komið og var verkalýðsforinginn barinn til dauða.

Þúsundir hafa mótmælt þessu, á sama tíma og Islam er syrgður.

Lögreglan þar í landi segir að einn sé í haldi grunaður um verknaðinn. Mótmælendur segja að morðið þjóni þeim tilgangi að fæla aðra frá því að berjast fyrir réttindum sínum.