Réttindahreyfingar svartra í Brasilíu skipulögðu mótmælasamkomur um landið allt síðastliðinn fimmtudag, til að krefjast þess að kynþáttabundnu ofbeldi í landinu ljúki, eftir langa röð hrottafenginna atvika. Deginum var gefið heitið „Þjóðardagur baráttunnar fyrir lífum svartra“. Africa News greindi frá mótmælunum.

Meðal kröfugerða mótmælenda var að réttlæti verði náð fram eftir morðið á Mariu Bernadete Pacifico fyrr í þessum mánuði. Að kvöldi fimmtudagsins 17. ágúst sl. var Maria Bernadete Pacifico myrt, leiðtogi félagshreyfinga í byggðinni Pitanga dos Palmares. Pacifico, sem einnig var þekkt sem Mãe Bernadete, eða mamma Bernadete, var 72 ára gömul. Tveir karlmenn með hjálma á höfði fóru inn á heimili hennar og skutu hana yfir tug skota í andlitið, að sögn The Guardian.

Síðustu sex árum ævinnar hafði Pacifico varið í að krefjast svara vegna morðsins á syni hennar, Fábio Gabriel Pacífico, sem var skotinn til bana árið 2017. Byggðin Pitanga dos Palmares er ein svonefndra quilombo-byggða í landinu, sem eiga rætur að rekja til fólks sem flúði úr þrældómi.

Árið 2022 skráðu yfirvöld yfir 47.000 ofbeldisfull dauðsföllum í Brasilíu. Í þremur tilfellum af hverjum fjórum voru þolendur svart fólk. Á sama tíma leið beindust yfir 83% allra lögregluafskipta í landinu að svörtum.