Enn og aftur varpar Svandís Svavarsdóttir matvælaráðherra fram þeirri sérkennilegu kenningu að vantraust Íslendinga á kvótakóngum stafi af vanþekkingu almennings. Hún virðist halda að með því að auka „gagnsæi“ í sjávarútveg þá myndi þjóðin treysta kvótakóngunum. Með öðrum orðum þá heldur Svandís að yfirgnæfandi meirihluti þjóðarinnar vantreysti þeim vegna þess að við vitum ekki nógu mikið. Henni virðist ekki detta það í hug að vantraustið stafi af reynslu þjóðarinnar af kvótakóngum.

Þetta kemur fram í aðsendri grein sem Svandís birtir í Morgunblaðinu. Hún hefst svona: „Krafa um aukið gagnsæi í sjávarútvegi er hávær meðal almennings og það er mín bjargfasta trú að með því að auka gegnsæið skapist betri skilyrði fyrir trausti milli sjávarútvegs og almennings. Það er staðreynd að aukið gagnsæi hefur jákvæð áhrif á ýmsa þætti viðskiptalífs. Það eykur líkur á að fyrirtæki sýni ábyrgð og dregur úr líkum á að farið sé á svig við reglur.“

Svandís heldur svo áfram að virðist halda að ef almenningur hefði bara aðgang að bókunum á hlutahafafundum, svo dæmi sé tekið um gagnsæi, þá myndi almennri óánægju með kvótakerfið á Íslandi ljúka. „Þá er aukið gagnsæi lykilatriði í því að bæta stjórnunarhætti þar sem nálgast má upplýsingar um alla þá þætti er máli skipta. Aukið gagnsæi dregur úr líkunum á hagsmunaárekstrum og þar með er líklegra að ákvarðanir séu teknar í þágu hluthafa og almennings. Það er ljóst að það er til mikils að vinna. Skortur á gagnsæi getur einnig verið sjálfstæð uppspretta vantrausts. Festist ógagnsæi í sessi til lengri tíma hefur það einnig neikvæð áhrif á traust almennings á stofnunum og á samfélagslegt traust. Stjórnvöld eru meðvituð um þessa stöðu, enda er fjallað um aukið gagnsæi í sjávarútvegi í stjórnarsáttmála ríkisstjórnarinnar,“ segir Svandís.