Willum Þór Þórsson heilbrigðisráðherra hefur skipað Eygló Harðardóttur formann stjórnar Sjúkratrygginga Íslands. Hún tekur við af Vilborgu Þ. Hauksdóttur, sem Svandís Svavarsdóttir skipaði í stöðuna árið 2020.
Eygló var þingmaður á vegum Framsóknarflokksins í um áratug, frá 2008 til 2017, og þar af í fjögur ár ráðherra félags- og húsnæðismála og um leið samstarfsráðherra Norðurlanda, í forsætisráðherratíð Sigmundar Davíðs og Sigurðar Inga, frá 2013 til 2017.
Willum skipaði um leið nýja meðlimi í stjórn sjúkratrygginga. Í fimm manna stjórn eru nú tvö eftir sem þar voru fyrir, það eru Guðmundur Magnússon, rekstrarverkfræðingur, sem verður nú varaformaður stjórnar, og Jónína Guðmundsdóttir, mannauðsráðgjafi.
Nýliðar í stjórninni eftir uppstokkun ráðherra eru, auk Eyglóar, tveir. Annars vegar Gunnar Sær Ragnarssonar, 28 ára gamall lögfræðingur, starfsmaður þingflokks Framsóknar á Alþingi og varabæjarfulltrúi Kópavogsbæjar fyrir hönd sama flokks.
Hins vegar Ólafía B. Rafnsdóttir. Ólafía er titluð ráðgjafi í tilkynningu ráðuneytisins, en hefur meðal annars starfað við „alhliða mannauðs- og stjórnendaráðgjöf“ innan fyrirtækisins Attentus. Hún starfaði áður sem aðstoðarmaður Benedikts Jóhannessonar, í knappri tíð hans sem fjármála- og efnahagsráðherra árið 2017.
Í fimm manna stjórn Sjúkratrygginga má því nú finna tvær persónur sem gætu með réttu titlað sig mannauðsstjóra.
Þá koma einnig nýir varamenn í stjórnina, Ívar Atli Sigurjónsson, flugmaður, og Kristín Hermannsdóttir, viðskiptafræðingur.