Kaupmáttur ráðstöfunartekna heimilanna á dróst saman um 5,2 prósent á öðrum ársfjórðungi þessa árs borið saman við sama tímabil árið 2022. Í gögnum sem Hagstofan birti á mánudag var rýrnunin sögð nema 6,1 prósenti, en daginn eftir birti stofnunin leiðrétt gögn: rétt tala er, segir stofnunin nú, 5,2 prósent. Þessi frétt hefur því verið leiðrétt til samræmis. Kaupmáttarrýrnunin skýrist fyrst og fremst af verðbólgu samkvæmt greiningu Hagstofunnar.

Ráðstöfunartekjur heimilanna jukust um 7,3 prósent milli tímabilanna, í krónum talið, ekki um 6,2 prósent eins og Hagstofan lét frá sér á mánudeginum. Heildartekjur heimila jukust um 11,6 prósent. Þar vega hæst launatekjur sem hækkuðu um tæp 12 prósent – í krónum talið. Þá jukust eignatekjur um 31 prósent milli þessara tímabila, sem skýrist einkum af vaxtaákvörðunum Seðlabankans, en vaxtatekjur jukust um 60% á tímabilinu. Lífeyristekjur og félagslegar tilfærslur jukust um 6,4 prósent, „sem skýrist að mestu leyti af hækkun lífeyristekna um 20% á tímabilinu,“ að sögn Hagstofunnar.

Að teknu tilliti til verðlagsþróunar dróst kaupmáttur saman þrátt fyrir ofangreindar hækkanir. Vísitala neysluverðs hækkaði um 9,4 prósent á tímabilinu. Heildargjöld heimilanna jukust um 17,2% milli fyrrnefndra tímabila, skattgreiðslur um 12% og tryggingagjöld um 8%. Eignagjöld jukust um 59,1% og vaxtagjöld um 61,3%. Þessar hækkanir vega ekki aðeins á móti launaþróun og auknum tekjum heldur snúa henni beinlínis á hvolf, svo úr varð, í heildina, 6,1 prósenta rýrnun á kaupmætti.

Til samanburðar dróst kaupmáttur ráðstöfunartekna heimila saman um 0,1 prósent á árinu 2022, að sögn stofnunarinnar en jókst ekki um 2,4 prósent eins og áður var haldið fram.