,,Við erum því miður ekki með velferðar- og geðheilbrigðiskerfi sem fullnægir þeirri þörf sem við stöndum frammi fyrir í dag og á meðan svo er munum við því miður tapa dýrmætum lífum í sjálfsvígum“, segir Kristín Ólafsdóttir í samtali við Morgunblaðið í dag og ítrekar orsakasamhengið:

,,Við viljum leggja áherslu á að forvarnir gegn sjálfsvígum hefjist strax í æsku… Það þarf að styrkja stoðir velferðar í samfélagi okkar þannig að hlúð sé að fólki allt frá fæðingu með meiri stuðningi við foreldra, öruggu fjárhaglegu og félagslegu umhverfi barna og ungmenna og umhyggju í skólakerfinu.“

Pieta-samtökin héldu stóra ráðstefnu um helgina og kynntu niðurstöður rannsóknar sem staðið hefur frá 2018 og byggir á tölfræði samtakanna frá upphafi. Skýrslan er unnin af Rannsóknum og greiningu. Sláandi orsakasamhengi er á milli félagslegrar stöðu og sjálfsvíga; þeir sem eru á einhvern hátt jaðarsettir, eins og innflytjendur og öreigar eru mun líklegri til að missa lífsvonina. Áfallasaga í æsku er mjög sterkur orsakaþáttur og ber þá hæst kynferðislegt ofbeldi, einelti og fíkn, heilsubrestur og fjárhagsvandræði.

Kristín Ólafsdóttir framkvæmdastjóri Pieta-samtakanna segir að samtökin taki árlega á móti stórum hópi fólks sem getur ekki leitað annað eins og staðan er í dag, því það sé gat í heilbrigðiskerfinu.