Sláandi niðurstöður hafa verið birtar um umfang spillingar á Íslandi. Á lista Transparency Internantional kemur fram að Ís­land held­ur áfram að falla nið­ur list­ann og sit­ur nú í nítj­ánda sæti.

Atli Þór Fanndal, framkvæmdastjóri Íslandsdeildar Transparency, segir í samtali við Samstöðina um niðurstöðurnar:

„Ég get ekki sagt að það komi mér á óvart að sjá Ísland falla enn einu sinni. Það er í samræmi við þróunina síðastliðinn áratug og kannski sérstaklega síðan Samherjamálið í Namibíu var afhjúpað.“

Atli Þór segir að í tilkynningu Transparency International sé Ísland notað sem dæmi um sleifarlag í baráttunni gegn spillingu. Enda hafi enginn enn verið ákærður í því máli hér.

„Það má þó kannski segja að fall Íslands á listanum getur verið jákvætt,“ segir Atli Þór, „því það bendir til þess að mýtan um Ísland sem ónæmt fyrir spillingu sé hægt og bítandi að hverfa.“

Hann bendir á að GRECO hafi sagt á sínum tíma að menn finni auðvitað aldrei það sem þeir neiti að leita að.

„Hugsanlega verður hægt að fá yfirvöld hér á landi til að hætta að trúa eigin þvælu um að spilling sé bara eitthvað útlenskt,“ segir Atli Þór. „Við getum vonandi farið að vinna gegn spillingu saman.“

Fjöldi mútu­mála, einka­væð­ing Ís­lands­banka, Sam­herja­mál­ið, spillt fisk­veið­i­stjórn­un­ar­kerfi og óreiða í fjármálum stjórnmálaflokka eru hjá Transparency nefnd sem dæmi sem vinni gegn tiltrú almennings. Sérstaka athygli vekur að árið 2023 höfðu 20 manns stöðu grunaðra vegna mútumála á Íslandi.

Samkvæmt könnun telur almenningur á Íslandi sjávarútveginn og fiskveiðistjórnunarkerfið spillt. Ísland situr á botni Norðurlandanna. Dan­­mörk er minnst spillta landið en Sómalía spilltasta land heims.

Sjá nánar hér: 2023 – Transparency.org