Ég moka snjó, fæ aldrei nóg, ég verð svo mjó af því að moka snjó, syngur Lára Stefánsdóttir í nýju lagi sem hún hefur samið og gefið út.
Lára er fyrrum þingmaður Samfylkingarinnar í NA-kjördæmi og skólameistari Menntaskólans á Tröllaskaga í Fjallabyggð. Hún þurfti að taka á honum stóra sínum fyrir nokkrum árum þegar sérlega snjóþungt var í Óafsfirði og birti þá reglulega myndir af sér á facebook með snjóskófluna að vopni.
Nú hefur Lára leyft gömlum draumi að rætast. Hún hefur birt myndband með laginu sínu á youtube og hafa facebook-vinir hennar bent á að skólameistaranum sé flest til lista lagt. Lúðrasveit er Láru til fulltingis í laginu.
„Þegar ég Reykjavíkurstúlkan flutti til Ólafsfjarðar varð snjór dálítil andleg hindrun og ég varð að gera það einhvernvegin skemmtilegt. Þá varð til þetta einfalda danslag við daglegan dans með snjóskóflunni,“ segir Lára.
Myndin er skjáskot af myndbandi með laginu en fylgjendur Samstöðvarinnar geta smellt á lag Láru hér í tenglinum að neðan. Kannski finnst einhverjum tilvalið að taka snjódansinn með henni í illviðrinu?
