Brynjar Níelsson, varaþingmaður Sjálfstæðisflokksins, er í hópi þeirra sem telja forsetaframboð landsmanna hálfgerðan sirkus. Hann skýtur á hjónin Baldur Þórhallsson og Feilx Bergsson í nýrri færslu sem og fleiri „rétthugsandi“.
„Ástandið versnar bara kringum þessi forsetaframboð,“ segir Brynjar. „Nú er björgunarsveitarmaðurinn hættur við, sem mér fannst vænlegastur í embættið. Hann hefði kannski getað gert gagn og bjargað einhverjum. Í staðinn er komin blanda af léttklæddum áhrifavöldum og elítu liði sem er að kafna úr mennta-og menningarsnobbi. Vellur froðan og rétthugsunin út um allt með slíkum krafti að manni verður eiginlega hálf flökurt. En fegurðin við lýðræðið er að allir geta boðið sig fram og það sem einum finnst óspennandi finnst öðrum spennandi.“
Ljóst þykir af orðum Brynjars að síðustu tvö holl sem tilkynnt hafa um framboð, Halla Tómasdóttir og hjónin Baldur Þórhallsson og Felix Bergsson, séu skotspónar Brynjars er kemur að tali hans um rétthugsun og elítusnobb. Sérstaklega virðist hann beina spjótum sínum að Baldri og Felix.
„Þó vil ég benda forsetaframbjóðendum á að forsetakosningar er einstaklingsbundið kjör og því ekki pör eða fjölskyldan öll í framboði. Ef ég byði mig fram væri ég einn í kjöri en ekki við Soffía. Hún myndi heldur ekki láta sjá sig með mér, hvorki á myndum né á almannafæri og sennilega ekki heldur kjósa mig. Einhver myndi segja að þetta væri merki um takmarkalausa ást,“ skrifar Brynjar á facebook.
