Guðlaugur Þór Þórðarson umhverfisráðherra hefur skipað Hildigunnni. H. Thorsteinsson nýjan veðurstofustjóra. Hún verður sjöundi veðurstofustjórinn í rúmlega hundrað ára sögu stofnunarinnar eftir því sem Einar Sveinbjörnsson veðurfræðingur greinir frá. Velta forsjóra stofnunarinnar hefur því ekki verið mikil en karlar hafa verið ráðandi í þessari stöðu.
Hildigunnur er verkfræðingur sem hefur m.a. starfað hjá Orkuveitu Reykjavíkur.
„Ég veit að það stuðar einhverja að hún skuli ekki vera með fagmenntun í einni af náttúrufræðigreinum eða fagsviðum Veðurstofunnar,“ segir Einar.
„Það pirrar mig ekki nokkurn skapaðan hlut, svo fremi að stjórnandinn setji sig vel inn í alla þætti starfseminnar og móti skýra framtíðarsýn,“ bætir Einar við.
Hildigunnur tekur við starfinu 1.júní og er skipuð til fimm ára.
Embætti forstjóra Veðurstofu Íslands var auglýst í nóvember sl. og sóttu átta um embættið.
Mikið púður hefur farið hjá Veðurstofunni undanfarin ár í margvíslegar skipulagsbreytingar. Undirbúningur var að sameiningu við aðrar stofnanir að frumkvæði ráðuneytisins en margt bendir til að hætt hafi verið við það.
Mikið viðbótarálag hefur undanfarið orðið á suma starfsmenn Veðurstofu, tengt eldsumbrotunum á Reykjanesskaga.