Saksóknarar Alþjóða sakamáladómstólsins hafa, að því er heimildir erlendra fjölmiðla herma, safnað saman vitnisburðum starfsfólks tveggja sjúkrahúsa á Gaza. Er talið að með því sé dómstóllinn að safna gögnum um hugsanlega stríðsglæpi Ísraela á Gaza.

Samkvæmt heimildum fjölmiðla ytra, þar á meðal Reuters fréttastofunnar, hafa rannsakendur tekið viðtöl við starfsfólk sem vann á al-Shifa sjúkrahúsinu og á Nasser sjúkrhúsinu. Er það gert á grundvelli þess að palestínsk yfirvöld hafa skýrt frá því að þau hafi fundið fjöldagrafir við sjúkrahúsin eftir að Ísraelar drógu herlið sitt til baka. 

Alþjóðlegi sakamáladómstóllinn tekur til skoðunar sakamál sem tengd eru einstaklingum sem sakaðir eru um að hafa framið stríðsglæpi, glæpi gegn mannkyni og þjóðarmorð.

Mannréttindaskrifstofa Sameinuðu þjóðanna lýsti því í síðustu viku að þar væri fólk slegið óhug vegna lýsinga á fjöldagröfunum sem fundist hafa við sjúkrahúsin, og bentu á að samkvæmt alþjóðalögum nytu sjúkrahús sérstakrar verndar í stríðsátökum. 

Almannavarnaryfirvöld á Gaza lýstu því síðastliðinn fimmtudag að 392 lík hefðu fundist í fjöldagröfunum, þar á meðal lík kvenna, barna og hinna öldruðu. Tugur líka fannst með bundnar hendur og fjöldi annarra var enn með æðaleggi fasta við sig. Er það talið benda til að fólk hafi jafnvel verið grafið lifandi.