Búast má við miklum látum í samfélaginu á morgun þegar upplýst verður hvort Bjarkey Olsen Gunnarsdóttir sjávarútvegsráðherra ákveður að leyfa hvalveiðar eða banna þær.
Ef Bjarkey leyfir veiðarnar eru meiri líkur en ella á að ríkisstjórnin starfi áfram.
Veiðar yrðu óþægileg ákvörðun gagnvart Svandísi Svavarsdóttur, samráðherra Bjarkeyjar í VG. Þingmenn meirhlutans hafa staðhæft á Samstöðinni að ef veikindi Svandísar hefðu ekki komið upp sem kallaði á fjarveru hennar um skeið eftir að allt var á suðupunkti í ríkisstjórnarsamstarfinu í kjölfar áfellisdóms Umboðsmanns Alþingis vegna stjórnsýslu Svandísar í tengslum við bann á hvalveiðum, hefði ríkisstjórnin sprungið.
Sumir þingmenn staðhæfa að það litla sem eftir er af fylgi VG og snýr að náttúruvernd gæti þurrkast út ef Bjarkey leyfir veiðarnar.
Hitt liggur einnig fyrir að ef Bjarkey bannar veiðarnar eru miklar líkur á að ríkisstjórnin springi.
Hallgrímur Helgason rithöfundur skrifar á facebook: „Frétt sumarsins er handan við hornið: ákvörðun um hvalveiðar, læti á hvorn veginn sem fer.“
Undir liðnum Þingið við Rauða borðið á Samstöðinni í kvöld sitja þingmenn meirihlutans og minnihlutans fyrir svörum og spá í ákvörðun morgundagsins. Flestir hallast að því að Bjarkey banni ekki veiðarnar. Sumir halda fram að Bjarkey reyni að fara bil beggja.
