Á morgun klukkan 16 hefur verið boðað til mótmæla fyrir utan Alþingi en á sama tíma mun þingsetning fara fram. Mótmælin eru skipulögð af mörgum helstu verkalýðsfélögum Íslands og er krafan að ríkisstjórnin fari í raunverulegar aðgerðir gegn háu vaxtastigi og verðbólgu.

Þessi mótmæli hafa verið sögð söguleg, en sumum hefur þótt það nokkuð djörf yfirlýsing svona fyrirfram, áður en mótmælin hafa farið fram. Einn af skipuleggjendum mótmælanna, Ragnar Þór Ingólfsson, formaður VR, verður gestur Rauða borðsins í kvöld en þar mun hann útskýra nánar hvað sé átt við með þeirri yfirlýsingu.

„Aðildarfélögin, stóru landssamböndin, hafa auðvitað komið að mótmælum áður, kannski svolítið í sitthvoru lagi. En ég man ekki til þess að stóru landssambönd stéttarfélaga tækju sig saman með þessum hætti til að mótmæla aðgerðarleysi ríkisstjórnar og krefjast einhverra aðgerða og það á þingsetningardegi. Ég hef ekki fundið neinn samanburð þar,“ segir Ragnar Þór og heldur áfram:

„Þessi kreppa, þessi verðbólga, þetta alltof háa vaxtarstig er auðvitað farið hafa áhrif á alla hópa, eða flesta hópa, með einum eða öðrum hætti. Meira að segja fólk sem skuldar lítið það er farið að átta sig á því að það verið að útiloka börnin þeirra, afkomendur þeirra, til að komast inn á húsnæðismarkaðinn.“

Viðtalið við Ragnar Þór má sjá og heyra við Rauða borðið í kvöld