Forseti Íslands, biskupinn, forsætisráðherra og forseti þingsins voru meðal voldugra kvenna sem kvöddu Ólöfu Töru baráttukonu en útför hennar fór fram í dag.

Drífa Snædal hjá Stígamótum er meðal þeirra sem hafa skrifað fallega um Ólöfu Töru sem barðist gegn kynbundnu ofbeldi.

„Við heiðrum minningu Ólafar Töru með því að halda baráttunni gegn kynbundnu ofbeldi áfram,“ segir Drífa. „Viðurkenna áhrif og afleiðingar þess, trúa, grípa brotaþola en fyrst og fremst að útrýma kynbundnu og kynferðislegu ofbeldi. Konur þekkja best afleiðingarnar.“

Mitt í sorginni og vanmættinum segir Drífa að það hafi vakið von að kirkjan hafi við útförina verið stútfull af konum sem séu tilbúnar í baráttuna sem Ólöf Tara hafi staðið fyrir.

„Þó það sé óþolandi að þessi barátta hvíli alltaf á herðum kvenna þá eru það við sem vitum hvað er í húfi að útrýma ofbeldi, við verðum flestar fyrir því. Og núna er stundin, hún er runnin upp! Nú þurfum við að virkja þekkingu okkar, samtakamátt, félagasamtökin, stofnanirnar, skólana, stjórnmálin og almenning. Við þurfum að hafa trú á því að við getum útrýmt kynbundnu ofbeldi og við verðum að ganga samhljóða inn í þá vegferð. Við hjá Stígamótum erum tilbúin eins og ávallt.“

Myndina birti Drífa á facebook, Ólöf Tara fyrir miðju.