Skipulagsmál eru orðin stjórnlaus. Sveitarfélög hafa afsalað sér valdi sem þau áður höfðu í skipulagsmálum. Fjármagnseigendur og verktakar ráða því í stað sveitarfélaganna áður hvernig mannvirki eru hönnuð og byggð með ömurlegum afleiðingum.
Þetta segir Magnús Skúlason arkitekt.
Hugsunin undanfarið hefur verið að græða sem mest á byggingum, þær verða fyrir vikið oft ljótar, ljóslausar, byggt er of þröngt og hljóðvist ekki góð. Magnús ræðir stórslys í þeim efnum ásamt Kristínu Ómarsdóttur verkfræðingi í samtali við Björn Þorláks við Rauða borðið á Samstöðinni.
„Þetta versnaði þegar vinstrimenn tóku við borginni,“ segir Magnús og vísar til umskiptanna 1994 þegar Reykjavíkurlistinn leysti íhaldið af hólmi við stjórn borgarinnar.
Þá kom fram í þættinum að í 13 ár hefur verið beðið leiðbeininga um hávaða frá Umhverfisstofnun. Kostur hefur um langt skeið verið gefinn á fráviki frá hávaðareglum sem nánast virðist nú litið á sem norm og skýrir meðal annars nálægð húsa við umferðargötur.
Erfitt getur reynst að gagnrýna þessi mál opinberlega. Voru nefnd þöggunardæmi í umræðunni þar sem fólk kýs að halda sér til hlés í stað þess að gagnrýna ástand mála – í þeim tilgangi að halda vinnu eða fá verkefni.
Sjá þáttinn með því að smella á hlekkinn hér að neðan.
