RÚV: Sif Gunnarsdóttir forsetaritari biðst velvirðingar á mistökum í tengslum við nýársboð forseta á þrettándanum. Þó nokkra vantaði á gestalistann, þar á meðal margra fyrrverandi forsætisráðherra og Ársæls Guðmundssonar skólameistara Borgarholtsskóla.

Gestalistinn í nýársboð forseta Íslands á þrettándanum hefur vakið athygli, í ljósi þess að nokkur áberandi nöfn þykja vanta á hann. Til að mynda eru Katrín Jakobsdóttir, Þorsteinn Pálsson, Geir H. Haarde og Jóhanna Sigurðardóttir, fyrrverandi forsætisráðherrar, ekki á meðal boðsgesta.

Þá vakti sérstaka athygli að Ársæll Guðmundsson, skólameistari í Borgarholtsskóla, var ekki á listanum.

Ársæll komst í fréttir á síðasta ári vegna símtals sem hann átti við Ingu Sæland, formann Flokks fólksins, um týnt skópar barnabarns hennar sem er nemandi í skólanum. Síðar sama ár var skipunartími hans sem skólameistari ekki framlengdur líkt og vaninn hefur verið. Sjálfur sagði hann augljóst hvað lægi að baki þeirri ákvörðun.

Í svari við fyrirspurn fréttastofu um gestalistann segir Sif Gunnarsdóttir forsetaritari þetta vera mistök. Nýtt boðskerfi hafi verið tekið í notkun í ár þar sem gestum var boðið að velja rafrænt á hvaða tíma þeir vildu þiggja boð í móttökuna. Boðið í ár var með því sniði að gestum var boðið á mismunandi tímum.

„Við yfirfærslu listans milli kerfa áttu sér stað mistök þannig að upplýsingar misfórust,“ segir í svari Sifjar. Óljóst er nöfn hversu margra duttu út, en eitt þeirra er Ársæll Guðmundsson.

„Forsetaritara finnst ákaflega leitt að þessi mistök hafi átt sér stað og biður alla hlutaðeigandi innilega velvirðingar.“