Vilhjálmur Birgisson verkalýðsforingi á Akranesi bendir á ofurhagnað íslensku bankanna vegna vaxtaokurs í færslu á facebook.
Vilhjálmur hitti Þorgerði Katrínu Gunnarsdóttur, utanríkisráðherra, í dag á Akranesi þar sem atvinnuhremmingar í héraði voru eitt helsta umræðuefnið. Rædd voru rekstrarskilyrði Grundartangasvæðisins, þar sem um 800 manns starfa hjá Norðuráli og Elkem auk afleiddra starfa. „Ég lýsti sérstökum áhyggjum af áhrifum fyrirhugaðra verndartolla sem gætu skaðað samkeppnishæfni íslenskrar framleiðslu, sem og þeirri staðreynd að raforka er nú orðinn dýrari hér á landi en t.d. í Noregi.“
Vaxtamál og húsnæðismál voru einnig í brennidepli og bendir Vilhjálmur á eftirfarandi:
Hreinar vaxtatekjur bankanna þriggja frá árinu 2021 til dagsins í dag nema nú um 550 milljörðum króna
Vaxtamunur bankanna er á bilinu 3,1–3,5%, á meðan hann er aðeins um 1,6% á Norðurlöndum
„Þetta er skýr vísbending um skort á samkeppni á lánamarkaði,“ segir Vilhjálmur.
Verðtryggingin sé kerfislægur orsakavaldur hárra vaxta og geri peningastefnu Seðlabankans nær óvirka.
„Fólk hefur hreinlega neyðst til að flytja lán sín – að upphæð um 400 milljarðar króna – yfir í verðtryggt form, vegna óbærilegrar hækkunar greiðslubyrðar af óverðtryggðum lánum. Þessi þróun er alvarleg og krefst pólitískrar umræðu og breytinga.“
