Í könnun Félagsvísindastofnunar fyrir ÖBÍ kom fram að 11% öryrkja greiða yfir 75% ráðstöfunartekna í rekstur húsnæðis. Ætla má að þetta eigi við allt að tvö þúsund manns. Víðast er miðað við að húsnæðiskostnaður eigi ekki að vera hærri en 25% af ráðstöfunarfé og að húsnæðiskostnaður yfir 40% sé verulega íþyngjandi.
Öryrki sem býr einn fær útborgað frá Tryggingastofnun tæplega 311 þús. kr. Ef húsnæðiskostnaður er 75% af þeirri upphæð og rafmagn og hiti þar af 15 þús. kr. þá væri húsaleigan er 218 þús. kr. sem er í raun undir markaðsleigu á lítilli íbúð. Sá sem býr við þessar aðstæður á þá eftir 78 þúsund krónur til að lifa út mánuðinn. Framfærsluviðmið umboðsmanns skuldara er 195 þús. kr. Öryrkinn í þessu dæmi kláraði því allan sinn pening um hádegi í gær og þarf að lifa á loftinu út mánuðinn.
Hér er ekki gert ráð fyrir húsnæðisbótum. Svo fólk fái slíkar bætur þarf að þinglýsa leigusamningi á samþykkta íbúð. Leiguhúsnæði uppfyllir ekki allt þau skilyrði og því ná bæturnar ekki til allra sem á þeim þurfa að halda.
Upplýsingar um könnun Félagsvísindastofnunar kom fram í umsögn ÖBÍ um frumvarp til laga um breytingu á lögum um vexti og verðtryggingu og húsaleigulögum sem Flokkur fólksins lagði fram. Í umsögninni segir að samkvæmt leigukönnun sem Húsnæðis- og mannvirkjastofnun lét framkvæma árið 2021 jókst hlutfall leigu af ráðstöfunartekjum milli áranna 2020 til 2021. Meðalhlutfall leigukostnaðar af ráðstöfunartekjum er 44% sem gefur til kynna mjög mikla greiðslubyrði vegna leigukostnaðar. Í könnuninni kemur einnig fram að tæp 30% öryrkja greiða meira en 50% af ráðstöfunartekjum sínum í leigu. Þar sem flest allir leigusamningar eru tengdir vísitölu má gera ráð fyrir að þessi greiðslubyrði hafi hækkað þrátt fyrir aukinn húsnæðisstuðning stjórnvalda í sumar.
Samstöðin er umræðu- og fréttavettvangur sem studdur er af almenningi í gegnum Alþýðufélagið. Ef þér líkar efni Samstöðvarinnar getur þú eflt hana með því að gerast einskonar áskrifandi sem félagi í Alþýðufélaginu. Þú getur skráð þig hér: Skráning félaga
