Guðmundur Björgvin Helgason ríkisendurskoðandi getur ekki svarað til um hvort skýrsla stofnunarinnar um sölu á hlutum ríkisins í Íslandsbanka komi fyrir vikulok, það er fyrir landsfund Sjálfstæðisflokksins í samtali við Morgunblaðið. Þórunn Sveinbjarnardóttir, formaður stjórnskipunar- og eftirlitsnefndar Alþingis, fullyrðir við Ríkisútvarpið að skýrslan mun ekki koma fyrir helgi.
Á landsfundinum mun Bjarni Benediktsson, fjármálaráðherra og sá sem ber mesta ábyrgð á sölunni, reyna að verjast formannsframboði Guðlaugs Þórs Þórðarson. Bjarni samþykkti söluna og söluaðferðir sem fjármálaráðherra og skipaði stjórn bankasýslunnar.
Stjórnmálaskýrendur geta velt fyrir sér áhrifum af skýrslunni á formannskjörið. Ef skýrslan er mjög vond er auðvitað betra fyrir Bjarna að vera laus við hana.
Þegar Alþingi óskaði eftir skýrslunni í vor var reiknað með að hún kæmi um mitt sumar. Rætt var um að kalla þing sérstaklega saman til að ræða skýrsluna, seint í júní eða byrjun júlí.
Síðan hafa liðið dagar, vikur og mánuðir. Undanfarnar vikur hefur verið sagt að skýrslan sé rétt handan við hornið, en samt tefst birting hennar.