Fyrir innrás Rússa í Úkraínu kostaði bensínlítrinn 270,90 kr. að meðaltali á Íslandi. Í dag kostar hann 320,20 kr. eða rúmlega 18% meira. Heimsmarkaðsverð á bensíni hækkaði við innrásina en er nú komið á sama stað og fyrir innrás. Íslensku olíufélögin eru því að taka til sín mun meira en efni standa til, rétt tæplega 50 kr. á lítra eða vel yfir tvö þúsund krónur í hvert sinn sem þú fyllir tankinn.
„Hagnaður olíufélaganna stefnir í met!“ skrifar Stefán Ólafsson prófessor og sérfræðingur Eflingar á vefinn. „Lækkun á heimsmarkaði hefur ekki skilað sér eðlilega til Íslands. Meðal annars þess vegna er verðbólga um 9% hér nú – og það gefur samtökum atvinnurekenda (SA) og hagfræðingum Seðlabankans tilefni til að fara fram á kaupmáttarskerðingu hjá launafólki. Það myndi auka hagnað og arðgreiðslur fyrirtækja enn meira en orðið er, bæði olíufélaga og annarra fyrirtækja.“
Reynsla íslenskra neytenda af olíufélögunum speglast vel í því sem Árni Guðmundsson skrifar undir færslu Stefáns: „Núna eru gríðarlega birgðir af eldsneyti til í landinu á háa verðinu, sem munu ekki klárast fyrr en næsta hækkun skellur á. Þá verða, að venju, litlar sem engar birgðir til og olíufélögin tilneydd að hækka verðið strax. Svona mun þessi (meinta) góðgerðarstarfsemi olíufélaganna halda áfram í góðu og innilegu samstarfi þeirra á millum … og mun verða svo lengi sem ekki tekst að koma böndum á þennan fákeppnismarkað“
Samstöðin er gjaldfrjáls vettvangur. Ef þér líkar efnið getur þú eflt Samstöðina með því að gerast félagi í Alþýðufélaginu og þá einskonar áskrifandi. Það kostar aðeins 1.250 kr. á mánuði, en þú mátt borga meira., Þú getur skráð þig hér: Skráning félaga
