Mikill munur er á breytingum á gjöldum fyrir þjónustu við börn milli sveitarfélaga á tímabilinu frá því að lífskjarasamningarnir tóku gildi til dagsins í dag. Verðlagseftirlit ASÍ hefur tekið saman breytingar á leikskólagjöldum, skóladagvistunargjöldum og skólamat frá 2019 – 2022 hjá 15 stærstu sveitarfélögum landsins.
Samantektin sýnir að gjöld fyrir skóladagvistun og skólamat hækkuðu mest á tímabilinu hjá Borgarbyggð, um 20,2% eða 5.985 kr. á mánuði en lækkuðu mest hjá Fjarðabyggð, um 19,9% eða 4.914 kr. á mánuði. Leikskólagjöld hækkuðu mest hjá Seltjarnarnesbæ, um 24,2% eða 6.590 kr. á mánuði en lækkuðu mest hjá Mosfellsbæ, um 10,6% eða 3.428 kr. á mánuði.
Ef samanlögð gjöld fyrir þjónustu fyrir börn hjá vísitölufjölskyldu eru skoðuð, þ.e. gjöld hjá fjölskyldu með eitt barn á grunnskólaaldri í skóladagvistun og skólamat og eitt barn í leikskóla, má sjá að þau hafa hækkað mest hjá Seltjarnarnesbæ, um 21,6% eða 139.117 kr. á ári. Hjá Fjarðabyggð hafa sömu gjöld hins vegar lækkað um 8,5% eða 50.903 kr. á ári.
Gjöld fyrir skóladagvistun og skólamat hækka mest í Borgarbyggð en lækka mest í Fjarðabyggð
Samanlögð gjöld fyrir þjónustu fyrir barn á grunnskólaaldri, skóladagvistun með síðdegishressingu og skólamat, hækkuðu í 13 sveitarfélögum af 15 frá 2019-2022, um 0,2-20,2%. Hlutfallslega hækkuðu heildargjöld mest hjá Borgarbyggð, 20,2% eða um 5.985 kr. á mánuði. Það gerir 53.865 kr. á ári m.v. 9 mánaða vistun. Næst mest hækkuðu gjöldin hjá Seltjarnarnesbæ, 19,3% eða 7.403 kr. á mánuði sem er mesta hækkun í krónum talið, 66.627 kr. á ári. Gjöldin lækkuðu mest hjá Fjarðabyggð, 19,9% eða um 4.914 kr. á mánuði sem gerir 44.226 kr. á ári.
Leikskólagjöld hækka mest hjá Seltjarnarnesbæ en lækka mest hjá Mosfellsbæ
Almenn leikskólagjöld (8 tímar með fæði) hækkuðu í flestum sveitarfélögum eða í 12 af 15. Mest hækkuðu almenn leikskólagjöld hjá Seltjarnarnesbæ, um 24,2%. Hækkunin nemur 6.590 kr. á mánuði eða 72.490 kr. á ári miðað við 11 mánaða vistun. Næst mest hækkuðu gjöldin hjá Akraneskaupstað og Ísafjarðarbæ, um 11% hjá hvoru sveitarfélagi fyrir sig.
Gjöldin lækkuðu hjá tveimur sveitarfélögum, mest hjá Mosfellsbæ um 10,6% eða 3.428 kr. á mánuði. Næst mest lækkuðu gjöldin hjá Fjarðabyggð um 1,8% eða 6.677 kr. á mánuði en gjöldin stóðu í stað á tímabilinu hjá Vestmannaeyjabæ.
Aukinn kostnaður vísutölufjölskyldu með einu barni í leikskóla og einu í grunnskóla
Frá árinu 2019 hefur samanlagður kostnaður vísitölufjölskyldunnar vegna þjónustu fyrir börn, þ.e. kostnaður foreldra með eitt barn í leikskóla og eitt í grunnskóla hækkað mest hjá Seltjarnarnesbæ um 21,6% eða 139.117 kr. á ári sé miðað við 11 mánaða vistun á leikskóla og 9 mánuði í skóladagvistun og skólamat. Næst mest hafa gjöldin hækkað hjá Borgarbyggð, um 12,6% eða 85.006 á ári. Þar á eftir kemur Akraneskaupstaður með 11,8% hækkun eða 82.618 kr. á ári.
Ef litið er til sveitarfélaga á höfuðborgarsvæðinu má sjá að gjöldin hafa hækkað um 9,8% hjá Kópavogsbæ eða sem nemur 64.653 kr. á ári. Hjá Reykjavíkurborg hafa samanlögð gjöld f. leikskóla, skóladagvistun og skólamat hækkað um 9,3% eða 49.573 kr. á ári og hjá Garðabæ nemur hækkunin 8,9% eða 68.908 kr. á ári.
Mesta lækkun á tímabilinu hefur orðið hjá Fjarðabyggð þar sem kostnaðurinn hefur minnkað um 8,5% eða 50.903 kr. á ári. Næst mest hafa gjöldin lækkað hjá Mosfellsbæ um 5,0% eða 32.794 kr. á ári.
Fréttin er af vef ASÍ: 139 þúsund króna hækkun á ári hjá vísitölufjölskyldu á Seltjarnarnesi en 50 þúsund króna lækkun í Fjarðabyggð.
