„Við bíðum átekta hvað gerist nú í kjaradeilum á almennum vinnumarkaði og bregðumst svo við í kjölfarið,“ sagði Þórarinn Eyfjörð, formaður Sameykis, þegar hann setti fund í fulltrúaráði félagsins í dag.
Þórarinn fór yfir fundi samninganefnda sem átt hafa sér stað undanfarið með viðsemjendum. Sagði hann að samninganefnd Samtaka atvinnulífsins standi fast á því að starfsfólk opinberra hlutafélaga fái ekki meira en það sem búið er að semja um í gegnum kjarasamning Starfsgreinasambandins og VR á almenna markaðnum. Hann sagði fundargestum að það gangi ekki upp því launatafla launafólks Sameykis sem þar starfa nær yfir aðra launasetningu en sú launatafla sem SGS samdi um við Samtök atvinnulífsins. Sameyki semur fyrir hönd þessa launafólks um kjarabætur samkvæmt launatöflum en ekki markaðslaunum. Ekki er hægt að semja um slíkt í kjarasamningum eins og gefur að skilja. Launatafla SGS nær engan vegin utan um launatöflu þessa hóps innan Sameykis sem semja þarf um.
„Samningar þessa hóps launafólks í opinberum hlutafélögum eru gerðir í kjölfar kjarasamninga á almennum markaði. Staðan er sú í dag að við göngum ekki frá kjarasamningum við ríkið, Reykjavikurborg og sveitarfélögin fyrr en búið er að ganga frá samkomulaginu um jöfnun launa milli markaða sem undirritað var 2016. Það samkomulag hefur áhrif á kjarasamninga. Þá er starfsfólk á opinberum vinnumarkaði búið að standa við sinn hlut í því samkomulagi eins og kveðið var á um og margoft hefur verið bent á,“ sagði Þórarinn.
