Tæplega helmingur, um 46 prósent, launafólks á Íslandi á mjög erfitt, erfitt eða nokkuð erfitt með að ná endum saman. Þetta kemur fram í skýrslu Varða, rannsóknastofnun vinnumarkaðsins, um stöðu launafólks á Íslandi. Þetta er talsvert meira en lífskjararannsókn Hagstofu Íslandi hélt fram í fyrra.
Í skýrslunni segir: „Niðurstöður könnunarinnar sýna að tæplega helmingur (45,7%) launafólks á mjög erfitt, erfitt eða nokkuð erfitt með að ná endum saman. Í lífskjararannsókn Hagstofu Íslands (2022a) átti fjórðungur landsmanna erfitt með að ná endum saman. Í rannsókn Vörðu eru þátttakendur einungis félagsfólks í aðildarfélögum ASÍ og BSRB og er samsetning þess hóps að einhverju leiti frábrugðinn samsetningu allra landsmanna. Innan heildarsamtakanna tveggja eru stærstu hópar láglaunafólks og innflytjenda á íslenskum vinnumarkaði. Að sama skapi eru síðustu tölur frá Hagstofnunni frá árinu 2021 en hér er greint frá stöðu launafólks árið 2023.“
Samkvæmt skýrslu Varða þá eru það helst konur, einstæðar mæður eða feður og innflytjendur sem eiga erftitt með að ná endum saman. „Hlutfall þeirra sem eiga mjög erfitt, erfitt eða nokkuð erfitt með að ná endum saman er hærra meðal kvenna (45,8%), einstæðra mæðra og feðra (67,6% og 53%), innflytjenda kvenna og karla (56,5% og 57,1%) og kvenna og karla með erlendan bakgrunn (49,7% og 40,5%) en annarra hópa. Sama mynstur sést þegar litið er til þeirra sem ekki geta mætt óvæntum 80.000 kr. útgjöldum án þess að stofna til skuldar. Hlutfall þeirra sem ekki geta mætt slíkum útgjöldum er hærra meðal kvenna (43,1%), einstæðra mæðra og feðra (64,4% og 49,3%), innflytjendakvenna og -karla (44,7% og 42,6%) og meðal kvenna og karla með erlendan bakgrunn (52% og 36,1%),“ segir í skýrslunni.