Um helgina fékk þýskt verkalýðsfélag kröfu sína um hækkun lágmarkslauna samþykkta og hætti við fyrirhugað tveggja daga verkfall. Félagið, EVG, stendur fyrir rúmlega 200.000 manns sem vinna í lestarkerfum Þýskalands.
AP fréttastofan greinir frá þessu. Félagið hafði sagt að þau myndu leggja niður störf í 50 tíma ef frá sunnudegi til seint á þriðjudag ef kröfum þeirra yrði ekki mætt. Lestarfyrirtækið Deutsche Bahn sagði að það hefði haft áhrif á öll lengri ferðalög yfir þann tíma og varaði einnig við því að flest lestarkerfi í héröðum Þýskalands yrði ekki starfshæf. Fyrirtækið varð við kröfu verkalýðsfélagsins um hækkun lágmarkslauna upp í 12 evrur á klukkutíma og sóttist eftir dómsúrskurði ef verkalýðsfélagið ætlaði ekki að hætta við verkföll. Verkalýðsfélagið gaf eftir en viðræður um önnur atriði halda áfram.
EVG hafði farið fram á 12 prósent hækkun launa en fyrirtækið bauð 10 prósent fyrir flest laun en 8 prósent fyrir þau hæstu. Verkalýðsfélagið vill samning sem gildir í eitt ár en fyrirtækið lagði til 27 mánuði.
Verkfallið, sem hafði haft áhrif á mikinn fjölda annarra lestarfyrirtækja og flutningafyrirtækja líka, hefði orðið eitt það stærsta á síðustu árum, í kjölfarið á stórum verkfallsaðgerðum í apríl.
