Tveir Íslendingar eru á leið á ungmennaráðstefnuna World Youth Festival í Sochi, Rússlandi. Ráðstefnuna munu ungmenni alls staðar að úr heiminum sækja. Í Rauðum raunveruleika á mánudaginn var tekið viðtal við Íslending sem ætlar að sitja ráðstefnuna og spurt um ásetning og ástæður ferðarinnar. 186 af 193 löndum heims taka þátt.
Hinn þátttakandinn vill ekki að hún sé nafngreind.
Ráðstefna sem byggir á gamalli hefð
Í kjölfar seinni heimsstyrjaldarinnar hófust reglulegar ungmennaráðstefnur og hátíðir í sósíalíska heiminum. Það er að segja öðrum og þriðja heiminum. Sú fyrsta var árið 1947. Tilgangur ráðstefnanna var að sýna samstöðu um frið og lýðræði og sem andófsafl gegn heimsvaldastefnunni. Þangað var boðið ungu fólki, sem bjó mögulega í ríkjum sem voru enn þá nýlendur, þar sem þau gátu myndað tengslanet við umheiminn og lært hvert af öðru.
Nýtt snið, svipaðar áherslur
Ráðstefnan í Sochi byggir á þessari arfleið en með aðeins breyttar áherslur. Ennþá er aðal áherslan á frið og alþjóðlega samvinnu. Ráðstefnan er sú stærsta sinnar tegundar í heimi. Hvergi annarsstaðar koma saman jafn margt ungt fólk frá svo mörgum ólíkum þjóðum.
Segir óásættanlegt að Íslendingar sitji hjá
Að sögn Kristins væru það mikil mistök ef enginn Íslendingur færi á þessa ráðstefnu. Teikn eru á lofti um breytta og jafnari heimsmynd og vill Kristinn að Ísland sitji ekki hjá í því ferli. Áherslur hátíðarinnar minna um margt á ýmsar áherslur BRICS-þjóðanna um alþjóðamál.
Unnið verður að því að finna sameiginlegar lausnir á sameiginlegum vandamálum og að læra um ólíka menningarheima. Hátíðin vill stuðla að samskiptum og samvinnu ungs fólks alls staðar í heiminum.
Segir vestrið bera mikla ábyrgð á stríðinu í Úkraínu
Aðspurður um hvort Kristinn hafi áhyggjur af því að vera að fara til lands sem réðst inn í Úkraínu segir Kristinn að Vesturlandabúar fái falskar og ófullnægjandi upplýsingar um stöðu mála í Úkraínu og aðdraganda innrásar Rússa.
Útþennsla Nató til Úkraínu hafi alltaf verið mikið viðkvæmnismál fyrir Rússa og Bandaríkjamenn þykjast ekki skilja það. Að sögn Kristins vildu Bandaríkjamenn þetta stríð.
Bandaríkjamenn höfðu afgerandi áhrif á framvindu mála í Úkraínu
Kristinn bendir á að borgarastríðið í Úkraínu, sem hófst 2014, átti rætur sínar að rekja til öfga hægri hópa sem bendla sig við nasisma.
Bandaríkjamenn höfðu verið að styðja slíka hópa, á mismunandi vegu, alveg frá lokum seinni heimsstyrjaldarinnar.
Þegar mótmælin byrjuðu í Úkraínu 2014 fóru þeir að styðja nasískar hægri hreyfingar á borð við Azov, Right Sector og Svoboda og ýttu undir málflutning þeirra. Hópar sem bendla sig stoltir við öfga þjóðernissinnanna sem börðust með Þýskalandi nasismans gegn Sovétríkjunum og eigin landsmönnum.
Segja má að Bandaríkin hafi beitt þessum hópum til þess að ná fram valdaskiptum í Úkraínu.
Rasísku öfga þjóðernissinnarnir höfðu aldrei mikinn áhuga á Evrópusambandinu.
Bandaríkjamenn völdu inn í ríkisstjórn Úkraínu
Símtal á milli Victoria Nuland, hátt settrar embættiskonu Bandaríkjanna, og sendiherra Bandaríkjamanna í Úkraínu á meðan Maidan-byltingunni stóð hefur vakið töluverða furðu. Þar má heyra þau ræða um það sem þau telja ákjósanlega ríkisstjórn í Úkraínu eftir að sitjandi forseta er vikið.
Nasismi í Úkraínu er raunverulegur
Í þættinum fjöllum við töluvert um sögu nasismans í Úkraínu og stöðu nasismans þar í dag. Kristinn nefnir sem dæmi um áhrif nýnasistanna að minnisvarðar um baráttu Sovétlýðveldisins gamla við heri Þýskalands nasismans hafa verið rifnir niður á meðan nýjar styttur sem heiðra nasisma og SS-sveitir eru reistar.
Leiðtogi fasistahreyfingarinnar Samtök úkraínskra þjóðernissinna, Stepan Bandera, er heiðraður sem þjóðhetja í Úkraínu, þrátt fyrir að hafa barist með Þjóðverjum gegn Sovétríkjunum, samlendum sínum.
SS-deild heiðruð í Úkraínu
Í seinni heimsstyrjöldinni ákváðu sumir Úkraínumenn að berjast með nasistunum frekar en úkraínska Rauða hernum. Minnisvarði hefur verið reistur til heiðurs þeirra í Úkraínu en deildin tók þátt í einu versta fjöldamorði stríðsins og vöktuðu fanga- og útrýmingarbúðir. Rasíska öfga hægrið í Úkraínu lítur á þessar sveitir sem hetjur opinberlega í dag.
Nato-þjóðirnar björguðu nasistum í kalda stríðinu og beittu þeim
Í þættinum er fjallað um hin fjölmörgu verkefni sem Bandaríkin og fleiri Vesturlönd tóku þátt í í kjölfar seinna stríðs. Nasistum var bjargað og þeir nýttir í leyniþjónustur vesturlanda, í NASA og í Nato. Ekki síst Úkraínskir nasistar.
Bandaríkjamenn áttu eftir að beita fasistum oft í kalda stríðinu en hernaðarbrölt þeirra er og hefur verið verulega umfangsmikið.
Nýlega var klappað fyrir úkraínskum nasista sem barðist með Þjóðverjunum í seinni heimsstyrjöldinni. Þar, að sögn Kristins, sést glitra í þau djúpu tengsl sem mynduðust á milli nasista og Nato-þjóðanna í kalda stríðinu.
Friður næst við samningaborðið
Kristinn leggur áherslu á hvað honum þykir stríðið á milli Úkraínu og Rússlands sorglegt. Þessar þjóðir voru áður miklar systurþjóðir og vill hann meina að ef ekki hefði verið fyrir tilstuðlan Bandaríkjamanna hefði verið hægt að fyrirbyggja þetta stríð.
Kröfur Rússa voru skýrar og reyndu þeir oft að finna friðsamlega lausn. Helstu kröfur þeirra fyrir (og eftir) innrás þeirra snérust um aukið sjálfræði Donbass-héraðanna og að Úkraína færi ekki í Nató. Rússar fóru fram á að halda Krímsskaganum.
Vesturlönd hafa ýtt Úkraínu áfram til að berjast með loforðum um takmarkalausan stuðning og um óraunhæfar væntingar til stríðsrekstursins.
Í dag sjáum við að sá stuðningur er ekki takmarkalaus á meðan stríðið hefur valdið ómældum mannskaða og eyðileggingu.
Mun uppfæra Samstöðina um gang ráðstefnunnar
Kristinn Hannesson mun veita okkur innsýn í ráðstefnuna, sem hefst núna 1. mars, og segja okkur frá henni að henni lokinni.
