Þrýstingur vex nú frá Sjálfstæðisflokksfólki á að Guðmundur Ingi Guðbrandsson vinnumarkaðsmálaráðherra leggi frma frumvarp í haust sem auki völd ríkissáttasemjara svo að hann geti stöðvað verkföll. Þetta var samþykkt í ríkisstjórn í vetur en Guðmundur Ingi lagði frumvarpið ekki fram í vor vegna andstöðu verkalýðshreyfingarinnar.

„Í kom­andi kjaralotu mun óhjá­kvæmi­lega reyna mikið á embætti rík­is­sátta­semj­ara. Líkt og frá­far­andi rík­is­sátta­semj­ari get­ur borið um er það vandi, ekki síst þegar við eig­ast fyr­ir­ferðar­mikl­ir for­svars­menn viðsemj­enda,“ segir í leiðara Moggans í dag. „Þá er nauðsyn­legt að sátta­semj­ar­inn hafi réttu verk­fær­in í kistu sinni til þess að halda þeim við efnið, knýja að samn­inga­borðinu eða bera samn­ings­drög milliliðalaust und­ir launþega og fyr­ir­tæki, ef samn­inga­menn hafa grafið sig of djúpt í skot­graf­irn­ar. Liðinn vet­ur dæmdi Lands­rétt­ur hins veg­ar að rík­is­sátta­semj­ari hefði hreint ekki þau verk­færi sem hann og all­ir aðrir höfðu ára­tug­um sam­an haldið. Við það fór starf rík­is­sátta­semj­ara út um þúfur og hann lét ekki löngu síðar af embætti. Röð um­sækj­enda var ekki löng.“

Af stílbörgðum er augljóst að þarna heldur Davíð Oddsson á penna. „Flest­ir litu svo á að Lands­rétt­ur hefði leitað uppi laga­tækni­leg­an óskýr­leika, sem lög­gjaf­inn þyrfti þá að laga. Það töldu menn að myndi ger­ast hratt og ör­ugg­lega hjá ný­bökuðum vinnu­markaðsráðherra; ekki síst þar sem að í stjórn­arsátt­mála hafði verið sér­stak­lega vikið að því að styrkja ætti hlut­verk rík­is­sátta­semj­ara, bæta verklag við kjaraviðræður og tryggja að þær drægj­ust ekki úr hófi.“

„Það reynd­ist nú öðru nær, því hinum vinnu­lúna vinnu­markaðsráðherra auðnaðist ekki einu sinni að leggja fram frum­varp þar að lút­andi í vor, hvað þá að koma því í gegn áður en samn­ingalot­an hæf­ist af al­vöru,“ heldur Davíð áfram. „Eins og lesa mátti um í frétt Morg­un­blaðsins í gær bend­ir ekk­ert til þess að Guðmund­ur Ingi Guðbrands­son vinnu­markaðsráðherra ætli að gera neitt í mál­inu í haust held­ur. Hann sagði að málið væri í skoðun, en „mögu­lega“ yrði lagt fram slíkt frum­varp í haust. Aðeins þó ef frum­varpið væri verka­lýðshreyf­ing­unni að skapi, líkt og hún sé með neit­un­ar­vald, bæði við rík­is­stjórn­ar­borðið og á hinu háa Alþingi!“

„Það er frá­leitt viðhorf út af fyr­ir sig, en verra er tóm­læti ráðherr­ans og aðgerðal­eysi gagn­vart þeim vanda sem blas­ir við þjóðfé­lag­inu í haust,“ skrifar Davíð. „Það er ekki leng­ur værukærð held­ur van­ræksla.“