Samstöðin fór og spjallaði við fólk í Kópavogi um nýju stjórnarskrána og aukið ofbeldi í samfélaginu.

Magnús Víkingur Grímsson var spurður hvort samfélagið væri orðið betra í dag ef nýja stjórnarskráin hefði verið samþykkt á sínum tíma „Ekki nokkur vafi um það, því hún er barn síns tíma sem að svo sannarlega þurfti að breytast og þróast, og taka á sig mynd í samræmi við nútímann.“ sagði Magnús Víkingur.

Pétur Jóhann Sólgarðsson var spurður hvort hann hefði áhyggjur af auknu ofbeldi á Íslandi. „Já, ég get alveg viðurkennt það, eins og bara í gærkvöldi“ og á hann þar við stunguárás sem átti sér stað á þriðjudaginn. Pétur er nýlega kominn til baka frá Bandaríkjunum þar sem hann býr og segir að Ísland sé að verða líkara Bandaríkjunum hvað þetta varðar.

Gísli Jónsen hafði sömuleiðis áhyggjur af auknu ofbeldi og taldi þetta tengjast auknum mannfjölda. Við spurðum hann hvað hann teldi að hægt væri að gera til að bæta úr stöðunni: „Bara vera góð við hvort annað og hlúa hvert öðru, passa upp á hvort annað.“

Hlynur Hrafn Hallbjörnsson taldi að fólksfjölgunin gæti valdið aukinni glæpatíðni. „Þetta getur líka verið bara hvernig þjóðfélagið er, því meiri sem mismunur er, því meira verður um glæpi. Það er bara þannig.“