Herforingjastjórnin í Níger, sem tók völdin í landinu 26. júlí síðastliðinn í valdaráni, hefur hafnað úrslitakostinum sem Samband efnahagslegrar samvinnu Vestur-Afríkuríkja (ECOWAS) gaf henni í gær, sunnudag. Sambandið hafði gefið herforingjastjórninni frest fram á sunnudag til að færa Mohamed Bazoum, forsetann sem hún steypti af stóli, aftur til valda ellegar standa frammi fyrir innrás í landið.

Herforingjastjórnin neitaði þessu og hefur nú lokað loftrými landsins í undirbúningi fyrir innrás Vestur-Afríkuríkja.

Þúsundir stuðningsmanna herforingjastjórnarinnar söfnuðust saman í gær í Níamey, höfuðborg Níger, þegar ljóst var að herforingjastjórnin ætlaði ekki að verða við kröfu Vestur-Afríkuríkja.

Talsmaður herforingjastjórnarinnar, Amadou Abdramane, tilkynnti lokunina á loftrýminu í ávarpi í ríkisfjölmiðli landsins. Á sama tíma sagði hann að búið væri að flytja herlið inní tvö lönd Mið-Afríku, í undirbúningi fyrir innrás í landið, og að herforingjastjórnin væri tilbúin til að verjast með öllum hernaðarmætti landsins, með stuðning fólksins að baki sér.

ECOWAS er nú þegar búið að beita Níger ýmsum hörðum efnahagsþvingunum, þ.á.m. ferðabanni ásamt því að þau hafa svo gott sem skorið á innflutning á orku til landsins.