Forseti suður-afríska þingsins. Mapisa-Nqakula, á yfir höfði sér handtöku vegna ákæru á hendur henni fyrir mútuþægni í embætti varnarmálaráðherra. Dómstóll í Suður-Afríku vísaði frá kröfu hennar um að lögreglu og saksóknurum væri óheimilt að hneppa hana í hald. Mál Mapisa-Nqakula er enn eitt í röð spillingarmála sem komið hafa upp og eru tengd flokksmönnum stjórnarflokksins Afríska þjóðarráðsins.
Mapisa-Nqakula er sökuð um að hafa þegið mútur að jafnvirði tæpra 20 milljóna króna af hendi ráðgjarfyrirtækis í hernaðarmálum á árabilinu 2016 til 2019, þegar hún sat á stóli varnarmálaráðherra. Þá halda saksóknarar því fram að Mapisa-Nqakula hafi farið fram á að fá enn frekari greiðslur, að jafnvirði um 15 milljóna króna, en ekki fengið.
Mapisa-Nqakula er háttsett innan Afríska þjóðarráðsins, sem fer með völd í landinu. Fjöldi spillingarmála hefur komið upp á yfirborðið að síðustu, tengd flokksmönnum Afríska þjóðarráðsins og er talið að það gæti sett flokkinn í mikinn vanda þegar kemur að þingkosningum sem fara eiga fram í lok maí á þessu ári. Nýjustu skoðanakannanir sýna að flokkurinn gæti fengið undir helmingi atkvæða í kosningunum. Það yrði í fyrsta skipti sem það myndi gerast frá árinu 1994, þegar flokkurinn komst til valda í fyrstu lýðræðislegu kosningunum í landinu eftir að aðskilnaðarstefnunni linnti. Nelson Mandela var þá, sem leiðtogi flokksins, kjörinn forseti Suður-Afríku.
