Hlutfall Covid-jákvæðra sýna nú í kringum 20 prósent

Stjórnvöld skima ekki lengur fyrir Covid-19 í samfélaginu eins og tíðkaðist þegar sóttvarnir stóðu hæst. Gögn um útbreiðslu smita eru því ekki aðgengileg. Vísbending um fjölgun smita birtist hins vegar í því hvert hlutfall jákvæðra greininga er af þeim sýnum sem þó berast gögn um, innan heilbrigðiskerfisins. Á þessu ári fækkaði hlutfalli jákvæðra sýna úr tæpum 30 prósentum í byrjun árs niður undir 10 prósent um mitt sumar, en hefur hækkað á ný og sveiflast nú milil 15 og 20 prósent.

Þetta er í samræmi við þróun annarra landa, bæði í Evrópu og Ameríku, eins og vænta má þegar landamæri standa opin ferðamönnum.

Hlutfall jákvæðra Covid-19 greininga á sýnum, fyrstu 32 vikur ársins. Bláa línan sýnir hlutfall hverrar viku, en brotna línan er tölfræðileg nálgun á tilhneigingu gagnanna: niður á við framan af árinu fram á mitt sumar, en upp á ný um þessar mundir.

Áhættuhópar skuli sýna varkárni

Í liðinni viku beindi blaðamaður fyrirspurn til embættis Sóttvarnalæknis um hvernig megi nú gæta að öryggi viðkvæmra hópa, þegar sameiginlegar sóttvarnir hafa verið felldar niður. Sóttvarnalæknir svaraði með tilvísun á leiðbeiningar sem gefnar voru út sumarið 2022. Þar er einstaklingum í áhættuhópum ráðlagt að sýna varkárni.

Meðal áhættuhópa eru þar sagðir aldraðir, barnshafandi konur, fólk með fíknsjúkdóma, geðraskanir, hjartasjúkdóma, krabbamein, langvinna lifrarsjúkdóma, langvinna lungnasjúkdóma, langvinna vöðva- og taugasjúkdóma, offitu, ónæmisbælingu, gigtar- og sjálfsónæmissjúkdóma, líffæraþegar, fólk með meðfædda ónæmisgalla, skerta nýrnastarfsemi eða sykursýki, ásamt börnum með langvinna lungnasjúkdóma, alvarlega hjartasjúkdóma, eða langvinna taugasjúkdóma.

Ofantaldir eru hvattir til að sýna varkárni, sem fyrr segir, án þess að forðast samneyti við annað fólk, viðhafa smitvarnir „sem felast í að viðhafa 1 metra nándarmörk og forðast fjölmenni eins og kostur er“. Þá er sagt að andlitsgrímur eigi við „í ákveðnum kringumstæðum“ og „tíður og góður handþvottur/handsprittun“ eigi alltaf við. Loks er þeim sem umgangast einstaklinga í áhættuhópum bent á sömu atriði og áhersla lögð á að „þeir haldi sig fjarri þeim ef þeir hafa einkenni sjúkdóms eða greinast með COVID-19.“

Þó að ekki beri lengur mikið á ráðleggingum yfirvalda til almennings vegna faraldursins er þetta plakat þó enn á meðal þeirra gagna sem vísað er til á upplýsingasíðu Landlæknis um Covid-19.

Við þurfum á þér að halda

Þú getur tekið þátt í að byggja upp öflugum fjölmiðli.

Samstöðin er í eigu lesenda, áhorfenda og áheyrenda. Með því að gerast áskrifandi getur þú orðið félagi í Alþýðufélaginu og þar með eigandi að Samstöðinni.

Áskrifendur borga fyrir það efni sem þeir nota en tryggja í leiðinni að aðrir geti notið þess. Þetta er því ekki eigingjörn áskrift heldur rausnarleg og samfélagslega ábyrg.

Samstöðin byrjaði sem umræðuþættir á Facebook en er nú orðinn að fréttavef, útvarps- og hlaðvarpsþáttum, skoðanapistlum og sjónvarpsdagskrá.

Við trúum að Samstöðin skipti máli fyrir samfélagið, að það sé þörf fyrir róttæka umræðu um málefni sem snerta fólk út frá sjónarhóli og hagsmunum almennings.

Ef þú ert sama sinnis skaltu endilega gerast áskrifandi að Samstöðinni og þar með einn af eigendum hennar.

Þitt framlag skiptir máli.

Ég vil styrkja Samstöðina