Á dögunum var tilkynnt í Kópavogi að til stæði að taka upp nýtt kerfi í leikskólum bæjarfélagsins. Í stuttu máli snýst það um að hafa fyrstu sex tímana ókeypis en snarhækka verðið eftir það. Svo mikið að leikskólagjöld í Kópavogi verða þau hæstu á höfuðborgarsvæðinu þegar ný gjaldskrá tekur gildi í september.

Nokkuð skiptar skoðanir hafa verið um þessar breytingar en bæjaryfirvöld vilja meina að þetta eigi að stuðla að því að börn dvelji skemmur á leikskólum yfir daginn. Finnbjörn Hermannsson, forseti ASÍ, tekur ekki undir en í kvöldfréttum RÚV í gær sagði hann aðð hækkun leikskólagjalda í Kópavogi lendi fyrst fremst á foreldum með lítið stuðningsnet og sveigjanleika í starfi. Með öðrum orðum þá sé það helst fólk í lágtekjustörfum og sem berst í bökkum sem má búast við því að verða fyrir enn einni tekjuskerðingu í haust.

Það er að segja ef það býr enn í Kópavogi en Illugi Jökulsson fjölmiðlamaður telur að markmiðið með þessari hækkun snúist í raun ekkert um leikskóla. Hann telur að meirihlutinn í Kópavogi, meirihluti Sjálfstæðisflokksins og Framsóknarflokksins, sé með þessu gagngert að færa sig nær Seltjarnarnesi og Garðabæ. Það sé gert með því að búa til hvata fyrir fátækt fólk að flytja úr bæjarfélaginu.

Illugi skrifar: „Kópavogur ætlar að fara „all-in“ á braut Seltjarnarness og Garðabæjar, losa sig við fátæka fólkið en hampa þeim ríku. Þetta er markviss leið til þess. Fátæka fólkið skal sent til Reykjavíkur og svo híar ríka fólkið í úthverfunum á félagsleg vandamál sem þar segja til sín. Held’essi stjórnvöld í Kópavogi ættu að skammast sín, en þau munu auðvitað ekki gera það.“