Þórdís Kolbrún Reykfjörð Gylfadóttir, utanríkisráðherra, tók þátt í ráðstefnunni Warsaw Security Forum í pólsku borginni Varsjá sem lauk í gær, miðvikudag. Þetta kemur fram í fréttatilkynningu ráðuneytisins.
Á ráðstefnunni voru Atlantshafsbandalaginu (NATO) veitt verðlaun Frelsisriddarans fyrir „framúrskarandi hlutverk sitt í að viðhalda friði beggja vegna Atlantshafs“. „NATO er bandalag drauma okkar,“ sagði forstöðumaður pólsku þjóðaröryggisstofnunarinnar, Jacek Siewiera, í ræðu sem hann flutti til heiðurs verðlaunahafanum. Fulltrúi Casimir Pulaski stofnunarinnar, hugveitunnar sem heldur ráðstefnuna, sagði NATO vera „árangursríkasta hernaðarbandalag í sögu heimsins, sem enginn hefur dirfst að ráðast á.“ Verðlaunagripurinn virðist vera sverð það sem aðmírállinn Rob Bauer ber á myndinni sem fylgir þessari frétt.
Mótun og þróun eftirspurnar
Ráðstefnan hefur verið haldin árlega frá árinu 2014, af fyrrnefndri hugveitu, Casimir Pulaski stofnuninni (Fundacja im. Kazimierza Pułaskiego), sem nefnd er í höfuðið á 18. aldar herforingjanum Kazimierz Pułaski. Frá upphafi, segir í pólskri Wikipedia-færslu um ráðstefnuna, var tilgangur hennar að „vekja meðvitund um starfsemi NATO og ESB á forsendum öryggismála, með samtali milli ráðamanna og sérfræðinga.“
Innrás Rússa á Krímskaga árið 2014 var meginviðfangsefni ráðstefnunnar þegar hún var haldin fyrst. Auk ráðamanna og sérfræðinga virðist, samkvæmt færslunni, fulltrúum hergagnaframleiðenda boðið til ráðstefnunnar: „Hafa ber í huga að einkageirinn er einnig mikilvægur þáttur í alþjóðaöryggismálum, ráðstefnan býður þeim því ekki aðeins að kynna hvað þeir hafa fram að færa heldur hjálpar til við mótun í og þróun eftirspurnar.“ Hér er lauslega þýtt úr enskri Google-þýðingu.
