Starfsmenn borgarinnar voru ekki lengi að háþrýstiþvo risastórt graffiti ,,Vopnahlé strax!“ sem spreyjað var í skjóli nætur fyrir framan Alþingishúsið sem ákall.
Ólafur Ólafsson myndlistarmaður harmar það að ákall um vopnahlé sem spreyjað var á stéttina fyrir framan Alþingishúsið skuli ekki hafa fengið að vera í friði. Ekki er vitað hverjir stóðu að graffiti-verkinu en það hefði sannarlega mátt flokka það sem listaverk og jafnvel ,,nota“ til að treysta í sessi fallandi friðarásýnd íslensku þjóðarinnar, því þótt Friðarsúlan spilli myrkrinu er friðurinn í skjaldarmerki Íslands í hættu vegna svaðilfara stjórnmálafólksins.
Listamaðurinn biður í bréfi til borgarstjóra um að fá að gera nýtt verk á sama stað til að ítreka kröfu um ,,Vopnahlé strax!“
Á samfélagsmiðilssíðu sína ritar Ólafur:
Kæri borgarstjóri Dagur B. Eggertsson,
Í gær eða fyrradag tók eða tóku sig einhver til og rituðu þetta mikilvæga og áríðandi ákall um vopnahlé á Gaza: VOPNAHLÉ!!! STRAX!!! á götuna framan við Alþingi Íslands. Snarlega voru skilaboðin háþrýstiþvegin burt af starfsfólki borgarinnar. Við íbúar Íslands stöndum með palestínsku þjóðinni og því voru vonbrigði okkar ólýsanleg yfir því að Ísland hefði setið hjá í atkvæðagreiðslu Sameinuðu þjóðanna og ekki skrifað undir ákall um Vopnahlé á Gaza! og að öllu gíslum sé sleppt úr haldi!
Íbúar Íslands standa því með skilaboðunum sem voru rituð á götuna framan við Alþingi okkar Íslendinga og við erum því líka sár og reið yfir því að þetta skýra ákall um frið í Palestínu, að drápum á saklausum borgurum linni, hafi verið háþrýstiþvegið burt!
Við krefjumst þess öll að Ísland leiðrétti sinn kúrs og krefjist afdráttarlaust vopnahlés á Gaza og að öllu gíslum verði sleppt (eins og skírt var krafist í yfirlýsingu Sameinuðu þjóðanna sem Ísland kaus ekki að styðja og varð okkur öllum til ævarandi skammar) og óskum þess því hér með að fá að mála þessi skilaboð aftur á götuna framan við Alþingi eða á aðra sambærilega mikilvæga götu í borginni eða vegg.
Kæru vinir, þið sem eruð sammála þessari ósk, megið endilega afrita textann og pósta sem ykkar orðum og setja við þessar eða aðrar mynd/ir af götuverkinu.
