„Ég hef heyrt að stjórnendur/forstjórar innan úr lífeyrissjóðakerfinu geri nú dauðaleit að afsökunum fyrir því að þurfa ekki að fylgja fordæmi bankanna um niðurfellingu vaxta og verðbóta, í þrjá mánuði, til handa Grindvíkingum. Það er auðvitað ekkert í lögum sem bannar sjóðunum að gera þetta. Engin lagaóvissa, Ekkert!“

Þetta skrifar Ragnar Þór Ingólfsson, formaður VR, á Facebook en hann segist hafa fengið það staðfest að forstjórar sjóðanna sé farnir að dusta rykið af 72 grein stjórnarskrárinnar, til þess eins að komast hjá því að leggja Grindvíkingum hjálparhönd.

„Já hugsið ykkur! Að loksins rís skrýmslið upp af föstum svefni þegar umræða er um hvort nokkrir sjóðfélagar fái sáralitla eftirgjöf af skuldum sínum við nokkra lífeyrissjóði. Eftirgjöf sem hefur engin áhrif á tryggingafræðilega stöðu þeirra eða áunnin réttindi í sjóðunum,“ segir Ragnar.

Hann segir þetta sýna vel að krefið sé rotið. „Og það þurfti þetta til. Eftir áratuga eignaupptöku ríkisins á verðbættum lífeyri landsmanna í gegnum skerðingar hafa lífeyrissjóðirnir og landssamtök þeirra vaknað. Og þau vöknuðu ekki við jarðskjálftana, ekki við eldgos, ekki við áratuga eignarnám á lífeyri vegna skerðinga heldur við sanngirniskröfu sinna eigin sjóðfélaga. Já þetta er rotið kerfi!“