Ragnar Þór Ingólfsson, formaður VR, segir að þrátt fyrir gífurlegt tap hjá lífeyrissjóðum þá sé rekstrarkostnaður þeirra í raun ótrúlega mikill. Það veki sérstaklega athygli hve gífurlega mikið fer í kostnað við stjórnendur.
„Hvers eigum við að gjalda? Árið 2022 töpuðu lífeyrissjóðirnir um 845 milljörðum. Rekstrarkostnaður fimm stærstu sjóðanna var 20,8 milljarðar. Þar af voru fjárfestingargjöld 15 milljarðar (þrátt fyrir gríðarlegt tap) og skrifstofu og stjórnunarkostnaður 5,8 milljarðar. Launagreiðslur til framkvæmdastjóra fimm stærstu sjóðanna námu 167 milljónum á árinu 2022 eða að meðaltali 33,4 milljónir á hvern,“ segir Ragnar Þór á Facebook.
Hann bendir á að þetta sé þó einungis 5 af 21 lífeyrissjóðum. „Von er á miklu tapi á árinu 2023 og ljóst að margir sjóðir muni skerða réttindi. Eignir lífeyrissjóðanna árið 2022 lækkuðu um 763 milljarða að raunvirði frá árinu 2021 samkvæmt tölum Seðlabankans og Landssamtaka lífeyrissjóða,“ segir Ragnar Þór og heldur áfram:
„Mismunur á iðgjöldum í samtryggingardeildir (289,4 milljarðar, séreignasparnaður dregin frá) og útgreiðslum samtryggingardeilda (207,3 milljarðar) var 82,1 milljarður sem bætist við virðisrýrnun eigna á milli ára. Má því álykta að tap lífeyrissjóðanna á síðasta ári (2022) hafi verið um 845 milljarðar.“
