Gunnar Hrafn Jónsson, fréttamaður og fyrrverandi þingmaður Pírata, hefur löngum vakið athygli á því ófremdar ástandi sem ríkir á Íslandi í geðheilbrigðismálum. Í jómfrúarræðu sinni á Alþingi árið 2017 spurði Gunnar Hrafn hvort til væri aðgerðaráætlun sem snéri að geðheilbrigðismálum. Hún var ekki til. Þá benti hann á þá skelfilegu staðreynd að um einn Íslendingur fellur fyrir eigin hendi viku hverja. Stuttu síðar fór Gunnar Hrafn í veikindaleyfi vegna þunglyndis.

Síðan þá hefur svo gott sem ekkert gerst í þessum málaflokki, þrátt fyrir að margir hafi reynt sitt besta við að vekja ríksstjórnina. Afleiðingin ætti ekki að koma neinum á óvart: þeim fjölgar einungis sem falla fyrir eigin hendi. Það fer ekki fram hjá Gunnari Hrafni, en hann greinir frá því á Facebook að nýjasta fórnarlamb hörmulegs geðheilbrigðiskerfis hafi verið vinur sinn.

„Enn einn vinurinn fallinn fyrir eigin hendi. Náði ekki einusinni að verða þrítugur. Þessar tölur bara hækka og hækka, unga fólkið heldur áfram að hrynja niður og ekkert nýtt  fjármagn sett í geðheilbrigðiskerfið eða forvarnir. Hlakkaði til að bjóða honum í kaffi í nýju íbúðinni en það verður víst ekkert af því,“ segir Gunnar Hrafn og bætir við:

„Það var ólíkt honum að hætta allt í einu að svara í símann, þó að ég vissi að honum liði illa. Eins og Bubbi söng um árið: Ekkert svar. Ekkert hljóð. Bara blóð.“