Óvenju slæmt veður í apríl hefur líklega ekki farið fram hjá neinum sem býr á suðvesturhorni Íslands. Veðurfræðingurinn Trausti Jónsson benti á í gær að fyrri hluti aprílmánaðar hafi verið talsvert kaldari en gengur og gerist. Raunar tveimur gráðum kaldari að meðaltali en á sama tíma síðustu 30 ár. Sumir hafa jafnvel talið að þetta séu fyrstu merki þess að Golfstraumurinn sé að hrynja, þó erfitt sé að segja til um það með nokkurri vissu að svo stöddu.
Sumardagurinn fyrsti styttist óðfluga, þann 25. apríl næstkomandi, en að sögn Einars Sveinbjörnssonar veðurfræðings þá megum við vænta sumarveðurs örlítið fyrr eða um næstu helgi. Ef sumarveður má kalla, það er að segja. Í Reykjavík gæti hiti náð allt að 9 stigum.
„Sú flugufregn hefur fengið vængi að vænta megi veðurbreytinga um helgina. Langþráð sunnanátt með hlýnandi veðri. Kortasyrpa Bresku Veðurstofunnar sýnir hvernig væn bylgja rís suðvestur í hafi og nær að öllum líkindu að flæða norður yfir land og bægja frá þrálátu kalda loftinu Sjaldan hafa menn held ég glaðari að sjá hæð yfir Bretlandseyjum og lægð á leið norður um Grænlandssund! Spáð er 8 til 9 stiga hita í Reykjavík og allt að 10 stigum norðan heiða,“ skrifar Einar á Facebook undir fyrirsögninni: „OG FAGNAÐ VERÐUR UM LAND ALLT!“ En það verður að koma í ljós.
